Piet Grobler huldig sy ‘liefste’ vroue
2012-08-04 23:41
Familielede van die bekende kunstenaar en boekillustreerder Piet Grobler, wat sy vrou en dogter in ’n gru-ongeluk in Gauteng verloor het, gaan oor drie weke saam met hom terug Brittanje toe waar die gesin die laaste drie jaar woon.
Dit is om te keer dat hy alleen tuiskom waar herinneringe van Griet (51) en Catherina (10) hom inwag.
Hulle het in Suid-Afrika vakansie gehou toe die ongeluk op Dinsdag 24 Julie gebeur het.
Vriende doen “alles in hul vermoë om dit moontlik te maak”, het Piet se swaer, Erich Lutz, gister aan Rapport gesê ná ’n dankdiens vir ma en dogter in die United-kerk in Stellenbosch.
Die vriende samel onder meer geld in vir vliegkaartjies vir familielede.
Piet sterk tans in Stellenbosch aan nadat ’n bakkie in sy broer, Diek, se motor vasgejaag het toe dié onklaar geraak het. Die ongeluk het gebeur toe Diek die Groblers na die O.R. Tambo-lughawe geneem het. Griet en Catherina het agterin gesit. Diek is net lig beseer, maar Piet loop nog met krukke nadat hy uit die hospitaal ontslaan is.
Die United-kerk was gister stampvol tydens die diens wat deur skrywers, uitgewers en akademici bygewoon is.
Vriendinne van Griet het komposisies van onder meer Haydn, Bach en Pachelbel gespeel.
Griet was voorheen ’n musiekonderwyseres aan Rhenish Primary School in Stellenbosch en Piet het ’n kunsgalery hier bedryf.
Hy is deesdae ’n lektor in illustrasie aan die Universiteit van Worcester en Griet het skoolgehou by die Malvern St. James-skool, waar Catherina ’n leerling was.
“Piet het altyd gesê hy gaan Engeland toe sodat sy vrou en dogter veilig is.
“Hy wou nou alleen na Suid-Afrika kom vir sy pa se 80ste verjaardag, maar toe verander hulle die besoek in ’n gesinsvakansie,” het Lutz gesê.
Eerw. David Hunter het gesê Griet en Catherina laat ’n “kaleidoskoop van herinneringe” na. Volgens hom “het die verpletterende verlies van dié twee pragtige mense skokgolwe deur ons gemeenskap gestuur”.
Griet was bekend om haar sagtheid en sensitiwiteit en Catherina se lewe is gekenmerk deur vreugde en haar liefde vir musiek, die natuur en diere, het hy aangedaan gesê.
Lutz het hartroerende huldigings van Piet aan sy vrou en dogter voorgelees.
“Jy is my liefste vrou. Ek is lief vir jou met liefde wat maar een maal in ’n leeftyd gebeur. Jy was fyn ingestel op my emosies en dié van Catherina. Jy is my beste vriend ooit. Ek sien jou gou weer, liewe Griet.”
Oor sy dogter het hy geskryf: “Catherina se lewe was ’n lied. Ons kon nie méér verwag het nie, Here. Hierdie dogtertjie was ons lewe. Ek het jou so lief, my kind. Ek sal jou altyd raaksien in elke blom en elke brakkie.”
Griet laat ook drie susters, Elise van Wyk, Emma Sennett en Noëlline Lutz, agter.