"Plaasmoorde is uiters wreed"
2012-12-01 23:58
“Plaasmoorde is meestal wrede moorde. En dit word al meer sadisties gepleeg.”
Eileen de Jager en Roelien Schutte, twee susters van Pretoria, het verlede jaar 117 plaasaanval-misdaadtonele landwyd deur hul maatskappy, Crime Scene Cleanup, skoongemaak.
Hulle lewer al 13 jaar lank dié diens en sê hulle kan ’n moordtoneel baie vinnig en akkuraat “lees”.
“Wat tydens plaasmoorde gebeur, is wreed. Ek dink nie mense besef die wreedheid van hoe boere en hul familielede in hul huise vermoor word nie,” sê De Jager.
“Mense maak ook ’n fout as hulle dink dit is eerder die jonger plaasboere wat terugbaklei gedurende ’n aanval.
Dit is dikwels die ouer slagoffers wat terugbaklei omdat hulle deur die jare baie meer waardevolle goed versamel het en dit wil beskerm.
“Maar almal word geteiken. Ons sien geen diskriminasie ten opsigte van ouderdom nie.” De Jager sê plaasmoorde raak ook al meer sadisties.
“Almal in die huis word deesdae gedurende die aanval vermoor. Selfs die troeteldiere. Mense word soms dae lank in die huise gemartel voordat die aanvallers vlug.
“Die publiek moet weet hoe wreed mense vermoor word. Ons was op tonele waar mense se vel van hul lywe geskil is; kinders wat in kookwater verdrink word. Dit is baie erg.”
De Jager sê hulle kom ook nou agter dat baie boere soliede deure by hul huise insit wat dit vir aanvallers moeiliker maak om in die huis in te kom.
“Baie boere, veral op die platteland, patrolleer ook nou hul grenslyne om hulself te probeer beskerm.”