Polisielede betaal dalk self as hulle mense onwettig in hegtenis neem

Binnekort sal dit dalk polisielede eerder as die belastingbetaler wees wat moet opdok in sake van onwettige inhegtenisneming.
Die appèlhof sal volgende maand besluit of polisielede “wat dink hulle kan doen wat hulle wil” moet opdok nadat hulle ’n Pretoriase man onregmatig in hegtenis geneem het.

Dié saak is na die appèlhof geneem nadat die hooggeregshof in Pretoria in 2010 bevind het die betrokke polisielede – en nie die polisiehoof soos die praktyk is nie – moet aanspreeklik gehou word vir die regskoste van ’n onwettige inhegtenisneming.

Waarnemende regter Roelof du Plessis het in sy uitspraak gesê ’n klag van skadevergoeding teen die minister van polisie is nie ’n voldoende afskrikmiddel vir onwettige optrede deur veiligheidsmagte nie.

“Inteendeel, die enigste party wat benadeel word deur skadevergoedingseise weens onwettige inhegtenisnemings is die belastingbetaler,” het Du Plessis gesê.

Du Plessis het gesê dit is belangrik dat wetstoepassingsbeamptes “wat met strafloosheid optree en dink hulle kan maak wat hulle wil bloot omdat hulle die gereg agter hulle het, in toom gehou word”.

Die uitspraak het gevolg op ’n geval van 15 November 2009 toe Mandla Ntsweni, ’n metropolisielid, Jack Coetzee van Pretoria in hegtenis geneem het op klagte van crimen injuria, roekelose en nalatige bestuur, die verontagsaming van ’n verkeersbeampte en die bestuur van ’n ongelisensieerde voertuig.

Luidens berigte het Coetzee destyds saam met sy gesin die Sondagaand van ’n uitstappie na die Hartbeespoortdam teruggekeer.

Toe hy Pretoria binne ry het hy ’n metropolisielid in die pad gesien.

Hy het vermoed die man is ’n voornemende rower en het aan die man beduie dat hy na die naaste polisiekantoor sal ry.

Coetzee het onder meer ’n rooi verkeerslig verontagsaam voordat tot ses metropolisievoertuie hom van die pad gedwing het.
Hulle het hom na die Pretoria-Wes-polisiekantoor geneem.

Coetzee se prokureurs het laat daardie aand ’n dringende aansoek by Du Plessis gebring.

Du Plessis het bevind die polisie se weiering om aan Coetzee borgtog toe te staan beteken hy is onwettig in die Pretoria-Wes-polisiekantoor aangehou. Du Plessis het Coetzee se onmiddellike ontslag aangevra.

Du Plessis het gesê ’n mens sou gewoonlik vir dié oortredings beboet word, maar indien ’n mens in hegtenis geneem is, sou die polisie borgtog moes toestaan.

Net as die individuele lede nie in staat is om die hele bedrag te betaal nie, sal die minister verantwoordelik gehou word, het Du Plessis bevind.