Ramp-boot ‘hul brood en botter’
2012-10-20 23:33
Julian Jansen en Marlene Malan
Die boot wat laas naweek naby Houtbaai omgeslaan het, was die trots van ’n bemagtigingsprojek waarvan agt gesinne in Hangberg, ’n vissersbuurt wat deur werkloosheid gery word, vir kos op die tafel afhanklik was.
Die kaptein van die Miroshga, waarvan twee passasiers in die ramp dood is, sê dié “agtergeblewe” gemeenskap moet nou van voor af bewys hy kan ’n suksesvolle toerismeonderneming bedryf. Tot dít gebeur is talle werkgeleenthede gesink.
Gregg Louw (45) was agter die stuur toe die Miroshga met 39 passasiers aan boord in yskoue water naby Duikereiland omgeslaan het.
Hy is die mede-eienaar van die bemagtigingsmaatskappy Southern Ambition Marine Safaris wat die Miroshga besit en ook woordvoerder van die Houtbaaise vrede-en-mediasieforum.
Die tragedie “het ’n groot sielkundige en maatskaplike uitwerking op die gemeenskap gelaat”, het Louw gesê.
Die Miroshga het ’n inkomste vir agt gesinne – twee daarvan enkelouer-gesinne – van Hangberg, asook ’n toergids van die Imizamo Yethu- informele nedersetting verskaf. Die boot is na die Tafelbaaihawe gesleep en Louw is nog nie seker of dit herstel kan word nie.
“Die Miroshga het vir Hangberg hoop gebring, hoop dat mense uit ’n agtergeblewe gebied ook ’n maatskappy, ’n boot, kan besit én dit mededingend en suksesvol kan bedryf.
“Ons het hard gewerk om sedert 2004 in die toerismehoofstroom te kom. Daar is baie vooroordele en sommige van jou mededingers wil nie hê jy as swartbemagtigingsgroep moet suksesvol wees nie. Ons moet weer hoop kry.”
Ofskoon die Suid-Afrikaanse Maritieme Veiligheidsowerheid (Samsa) nog die oorsake van die ramp ondersoek, sê Louw daar was “baie tegniese redes” vir die ongeluk. Dis al wat hy in hierdie stadium wil sê.
’n Passasier het aan Rapport gesê die buiteboordenjins het verskeie kere uitgesny toe groot golwe oor die boot begin spoel het. Beangste passasiers het in die koue water gespring.
Die drenkelinge is deur verskeie bote, waaronder die rubberboot van nege selferkende perlemoen- en kreefstropers van Houtbaai, te hulp gesnel.
’n Britse toeris, Peter Hyett (64), het verdrink, asook die toergids John Roberts (36). Meer as 600 mense het Roberts se begrafnis gister in Houtbaai bygewoon.
Volgens Louw het Roberts die dag voor die ramp gesê: “Sal mense kan glo dat die hemel onder die see kan wees?”