Mnr. Jacob Maroga was op die punt om ’n witwarm rasse-dokument,
verpak as ’n strategiese voorlegging, op Eskom los te laat toe die gordyn oor
hom sak.
Maroga het vandeesweek bedank ná ’n rasgekleurde stryd met mnr.
Bobby Godsell, voorsitter van die Eskom-raad, wat self vroeër bedank het, maar
nou deur die regering gevra is om terug te kom.
Me. Barbara Hogan, minister van openbare ondernemings, het ’n
gesprek versoek. Haar woordvoerder, me. Ayanda Shezi, het gesê die minister is
by die beraad van die regerende alliansie, maar sal Godsell voor die einde van
die naweek wil spreek.
Godsell het nie gister selfoonnavrae beantwoord nie.
In verdere verwikkelinge berig Japhet Ncube dat die
Black Management Forum en die ANC-jeugliga steeds aanvoer Maroga het nooit
bedank nie en dat sy regte geskend word.
Bronne na aan Maroga sê hy sal hof toe gaan en kan miljoene ryker
wees as hy wen. Maroga het nie gister hieroor kommentaar gelewer nie.
Rapport
is in besit van ’n dokument van Maroga, gedateer 22 Oktober. Daarin blyk sy
politieke toornigheid teen veral “wit toesighouding” by Eskom.
Maroga het gister by navraag bevestig hy het so ’n dokument
geskryf, maar wou geen kommentaar lewer oor die besonderhede nie.
Sy tirade oor die “wit fenomeen” by Eskom beloop drie van die 25
bladsye en hy looi veral me. Susan Olsen, ’n konsultant wat hom vroegtydig
gewaarsku het oor Eskom se energiekrisis.
“Die manier hoe status en aandag aan die Olsen-verslag verleen is,
is ’n voorbeeld van die mentaliteit van wit toesighouding.
“Die Olsen-verslag is deur ’n wit persoon geskryf en deur ’n wit
persoon laat uitlek aan die media en ’n politieke party. Dit het nie saak gemaak
of hierdie verslag in antwoord was op reeds geïdentifiseerde swakhede wat ons
sou takel nie,” skryf Maroga.
Hy vaar ook driftig uit teen ’n groep wit voormalige uitvoerende
direkteure wat hulle ten doel gestel het om Eskom te adviseer en te ondersteun
gedurende die kragvoorsiener se moeilike tyd.
“Op sigwaarde het ek dit aanvanklik as ’n goeie gebaar beskou, maar
dit het later duidelik geword hul motivering is gedryf deur ’n mentaliteit van
wit toesighouding eerder as ’n opregte begeerte om die Eskom-leierskap te help.
“Ons weë het intussen geskei en hulle het nou ’n veldtog geloods
wat krities is teenoor die leierskap van Eskom en die regering.”
Maroga haal ook sy gramskap op die media uit en spyker sy
verontwaardiging aan die deur van “?’n klomp mense in bestuurstrukture van Eskom
wat meer geloofwaardigheid gee aan die verslaggewing van die wit gedomineerde
media as aan die interne bestuursprosesse van Eskom”.
Dr. Manie van Dyk van die DA sê die verslag “ontbloot Maroga se
rassistiese ondertone duidelik”.
Me. Patricia de Lille, OD-leier, meen “die gedeelte van sy dokument
wat handel oor transformasie klink soos ’n persoon wat baie onseker is en dan sy
toevlug neem tot veralgemenings wat nie deur feite gestaaf kan word nie”.