Reeva se laaste geskenk in rooi strepe toegedraai
2013-02-23 23:04
Sowat 12 uur voor haar dood het Reeva Steenkamp ’n fotoraam met foto’s van haar en Oscar Pistorius saam in geskenkpapier met rooi strepe laat toedraai.
“My kêrel hou baie van Valentynsdag,” het sy volgens ’n winkelassistent by Party Box in die Hazeldean Square-winkelsentrum gesê.
Die sentrum is naby die Silver Woods-landgoed in Pretoria waar Steenkamp Donderdagoggend vroeg in Pistorius se huis doodgeskiet is.
Die winkelassistent, wat nie haar naam genoem wou hê nie, het gesê sy het aanvanklik nie baie aandag aan Steenkamp gegee toe sy Woensdagmiddag by die winkel ingestap het nie.
“Sy was net ’n gewone, vriendelike klant.”
Steenkamp was op soek na Valentynsdag-geskenkpapier, wat die winkel nie gehad het nie, maar die assistent het gesê hulle het wel ander papier.
Steenkamp het toe ’n fotoraam uit haar motor gaan haal sodat dit toegedraai kon word.
Sy het geskenkpapier met rooi strepe gekies.
Toe die assistent die vier foto’s van Steenkamp en Pistorius as gelukkige paartjie sien, het sy Pistorius herken.
Sy het Steenkamp egter nie daaroor uitgevra nie.
“Ons het grappies gemaak dat ’n vrou iets vir haar kêrel moet koop as sy iets op Valentynsdag wil kry.
“Sy was baie vriendelik.”
Willie Viljoen, die eienaar van Party Box, sê Pistorius het gereeld in die sentrum inkopies gedoen en hy het Steenkamp ook al daar gesien.
“Sy was ’n aantreklike vrou.”