Regse nes op plaas gekry
2009-12-12 22:15
- Artikelopsies
- Deel
- Kry Rapport op
’n Arsenaal onwettige aanvalswapens, ’n godsdienstige, verregse sekte wat swart mense verafsku – én uiters geheime vergaderings op ’n afgeleë plaas.
Dít is die katnes wat die polisie oopgekrap toe hulle toegeslaan het op ’n verregse sekte met Boeremag-verbintenisse en dié se planne in die kiem gesmoor het.
Intelligensiebronne sê die sekte kon vir “erge bloedvergieting” gesorg het as daar gekyk word na die aantal wapens wat in hul besit gevind is.
Dié sekte se basis is in die Boland, sowat 100 km van Ceres af wanneer mens op ’n verlate grondpad ry, maar sy tentakels strek landwyd. Dit het geheime selle tot in Bela-Bela (Warmbad).
Die Jessurun-broederskap glo swart Suid-Afrikaners is “dierlike skepsels” waarmee wittes nie mag meng nie. Wittes wat dit wel doen, moet volgens die broederskap “uitgesonder”word.
Die groep het noue bande met die Suidlanders-beweging, wat glo wit mense gaan op groot skaal deur swartes uitgemoor word sodra oud-pres. Nelson Mandela tot sterwe kom.
Die groep het selfs ’n boek, Dimensies van apartheid, geskryf waarvolgens hulle leef.
Hul bedrywighede word so ernstig geag dat die hoogs gespesialiseerde Valke die ondersoek oorgeneem het.
’n Vergadering tussen die Jessurun-broederskap en die Suidlanders, wat Boeremag-bande het, sou Vrydag op die plaas Grootdam plaasgevind het.
Daar sou onder meer bespreek word hoe die volk (wit mense) ingelig moet word dat die Groot Vlug na die Noord-Kaap sal wees.
Die inhegtenisneming van die sekte se beweerde leiers, mnre. Johan Pretorius (30), Peter White (45) en Jan Roodt (64), asook ’n 17-jarige en me. Linda Coertze (44), het dié vergadering egter gekelder.
Hulle ontken skuld op aanklagte van poging tot moord, naamskending en die besit van vuurwapens en ammunisie.
Die groep het ook geweier dat nie-wit polisiebeamptes hulle tydens hul aanhouding ondervra, kos gee of enigsins aanraak.
Almal is egter nou vrygelaat nadat die hof Vrydag ook borgtog aan Pretorius en White toegestaan het.
Mnr. Sakkie Kroukamp, hul regsverteenwoordiger, het aangevoer hulle is nie weens hul ideologieë aangekla nie.
Hul borgtogvoorwaardes verbied hulle egter om in Ceres of op die plaas te kom.
Die lede is van die Strand, Somerset-Wes, Houtbaai en Bela-Bela en verskyn weer op 19 Januarie in die hof.
Die Valke ondersoek die oorsprong van die outomatiese en halfoutomatiese wapens. Party is afkomstig van ’n weermagkommando in Potchefstroom.
Talle mense wat bande met die verdagtes word, word ook in “Transvaal” ondervra, het sr. supt. Christiaan Theron, ondersoekbeampte, tydens die borgtogaansoek getuig. Swaar gewapende wetstoepassers het die twee vergesel.
Theron het gesê nog mense kan in hegtenis geneem word. Nog klagte sal glo bykom en nog wapens is glo in die plaasgebied versteek.
;’n Plaaslike menseregte-aktivis wil hê die polisie moet ondersoek ?instel? na? of ?die moord op ’n boer van Ceres, wat die sekte wou ontbloot enkele dae voordat hy vermoor is, nie met die groep verband hou nie. Dié boer was bekend vir sy werk met swart en bruin mense.
Die sekte is einde November oopgevlek toe lede op mekaar geskiet het oor gerugte van seks met ander se vroue. Die polisie sê bruin werkers is ook van die plaas gesit. Dit het tot die hofsaak gelei.
’n Vroulike sektelid met gapende wonde aan haar kop het die polisie vertel sekteleiers sê demone is daarvoor verantwoordelik.
’n Sektelid se ma het aan Theron gesê die sekte glo “die wit nasie is die Lig van God en alle ander rasse is van die duister”.
Volgens Theron is die groep ’n gevaar vir Suid-Afrika. “Hul planne is betyds in die kiem gesmoor.”
- Rapport