Regsman se lewe was stryd vir regte
2012-12-01 23:58
- Artikelopsies
- Deel
- Kry Rapport op
Oudhoofregter Arthur Chaskalson is gister in die ouderdom van 81 in die Milpark-hospitaal in Johannesburg oorlede.
Hy is verlede Dinsdag met leukemie gediagnoseer en dadelik in die hospitaal opgeneem.
Boodskappe van medelye aan Chaskalson se vrou, Lorraine, en hul twee seuns, Matthew en Jerome, het gistermiddag ingestroom.
Chaskalson was deel van die verdedigingspan wat oudpres. Nelson Mandela gedurende die Rivonia-verhoor van die galg gered het.
Hy was die eerste president van die konstitusionele hof, het Mandela as eerste president van die demokratiese Suid-Afrika ingesweer en was hoofregter van 2001 tot 2005.
Sello Hatang, woordvoerder van die Nelson Mandela-sentrum, het gister gesê Chaskalson sal altyd onthou word as iemand wat hom vir menseregte beywer het in die moeilikste van tye.
Pres. Jacob Zuma het gesê Chaskalson se lewe was een van ’n moedige stryd teen apartheid.
“As die eerste president van ons konstitusionele hof laat hy ’n spesiale afdruk op die bou van ’n verenigde, nie-rassige, nie-seksistiese regstaat.
“Namens alle Suid-Afrikaners reik ons uit na sy vrou en gesin en salueer ons ’n lewe onlosmaaklik deel van Suid-Afrika se pad na vryheid,” het Zuma gesê.
Gister was Internasionale Vigsdag en dokters het op Twitter Chaskalson se uitspraak in Julie 2002 in herinnering geroep waarin hy die regering beveel het om antiretrovirale middels aan MIV-positiewe swanger vroue te gee.
Vigsaktiviste en die regering was in daardie stadium toe al ’n jaar lank in ’n bittere stryd gewikkel.