Rika se 1ste rol: gratis DVD
2012-09-01 23:54
Christine van der Westhuizen
Wat gebeur as twee studente wat mekaar nie kan verdra nie op mekaar verlief raak? Kraai (Rika Sennett) is ’n bedorwe rykmansdogter en Jurie Anker (Rod Alexander) ’n “maplotter” in Snip en Rissiepit, die klassieke Afrikaanse fliek wat Rapport se lesers op Sondag 16?September gratis saam met die koerant kry.
Kraai se ouers meen Jurie is nie goed genoeg vir haar nie. Sy verbreek die verhouding en begin met ’n ander, jaloerse ou uitgaan – en die vonke hou aan spat.
Dit was Sennett se eerste professionele rol en ook die eerste liefdesdrama van Jan Scholtz wat verfilm is. “Toe hulle sien die resep werk, dié van ’n man en meisie wat eers nie van mekaar hou nie en dan verlief raak, is dit weer en weer in ander rolprente gebruik,” vertel sy.
Sy was destyds ’n derdejaar-dramastudent aan die Universiteit van Stellenbosch en het vir die aardigheid saam met ’n vriendin as agtergrondspelers in ’n fliek gaan speel.
“Elmo de Witt het my daar raakgesien en wou hê ek moes in Johannesburg ’n oudisie vir ’n rol kom aflê, maar ek was lekker neus in die lug, ’n bietjie van ’n snob,” lag sy. “Maar toe dink ek dit sal die ideale geleentheid wees om sommer ook vir my ouers in Johannesburg te kom kuier en daar kry ek die rol van Kraai.
“Omdat ek self ’n student was, het die karakter my soos ’n handskoen gepas. Ek wou ná die verfilming nie teruggaan universiteit toe om my graad te voltooi nie, en hier is ek jare later, steeds sonder daardie stukkie papier.”
Sennett het daarna in Manie van Rensburg se Die Square gespeel, ’n fliek met politieke ondertone “wat sy tyd vooruit” was.
Die verhoog het haar geroep en sy was onder meer by die Markteater, Truk en Kruik betrokke en op televisie in onder meer Erfsondes en Hillside te sien.
Deesdae is sy terug by haar eerste liefde, rolprente. “Ek is mal oor die intimiteit en eerlikheid van rolprentwerk.”
Haar jongste fliek, Verraaiers, oor ’n Boeresoldaat wat besluit om die oorlog die rug toe te keer om sy gesin te beskerm, wys tans op die Silwerskermfees en begin in Februarie 2013 in teaters draai.
Rod Alexander, Sennett se mede-akteur in Snip en Rissiepit, het hom mettertyd in ’n oudio-visuele onderneming begewe en vervaardig deesdae onder meer dokumentêre programme.
Ander bekendes in Snip en Rissiepit is Gaenor Becker, Ben Dekker en Eckard Rabe.