Roadlink voel ‘geviktimiseer’ ná 3 busse geskut word
2012-06-30 23:39
- Artikelopsies
- Deel
- Kry Rapport op
Jacques Steenkamp in Johannesburg
Die Valke het die afgelope week met die voormalige vervoerbestuurder van SA Roadlink oor die maatskappy se vervalste vervoerpermitte vergader.
André Smit (42), wat ’n maand gelede onthul het hoe SA Roadlink hul vervoerpermitte vir Gauteng self uitreik, sê ’n kaptein van die Valke, asook ’n senior amptenaar van die Gautengse departement van paaie en vervoer, het hom Dinsdag in Boksburg besoek.
Volgens Smit is dit dié senior amptenaar se handtekening wat op die vervalste dokumentasie gebruik word.
“Die man is woedend en wil weet wie gebruik sy handtekening om daardie dokumente te vervals.
“Ek dink hy het self in groot moeilikheid beland hieroor,” sê Smit.
Hy sê die Valke het sy verklaring afgeneem en hulle het aangebied om hom en sy gesin in getuiebeskerming te plaas aangesien hy steeds doodsdreigemente ontvang.
“Die ouens wat my die afgelope maand drie tot vier keer ’n week bel, doen dit steeds, maar hulle praat nie meer nie. Ek hoor net hoe haal hulle asem oor die foon,” sê Smit.
Kol. McIntosh Polela, Valke-woordvoerder, kon nie gister vir kommentaar bereik word nie en Octavia Mamabolo, woordvoerder van die Gautengse departement van paaie en vervoer, het via SMS laat weet sy is met vakansie en kan nie help nie.
SA Roadlink het egter die afgelope week weer in die pekel beland nadat drie van sy busse in onderskeidelik George en Beaufort-Wes geskut is.
Die Burger het gister berig twee SA Roadlink-busse is Donderdag in George en een bus Vrydagoggend in Beaufort-Wes van die pad getrek.
Kenny Africa, die Wes-Kaapse verkeershoof, sê die bus in Beaufort-Wes het defekte en daar is probleme met sy permit. Die bus is geskut en die gebruik daarvan opgeskort.
Die busse wat op George van die pad getrek is, was onderskeidelik op pad van Durban na Kaapstad en van Kaapstad na Durban. Hulle het ook verskeie defekte en die gebruik van die busse is opgeskort.
Nolan Padayachee, SA Roadlink se woordvoerder, sê die maatskappy word geviktimiseer en SA Roadlink gaan moontlik sy regspan opdrag gee om ’n dringende hofbevel aan te vra teen die owerhede se “onregverdige en arbitrêre administratiewe aksie”.