Romantiese held Rod ‘altyd maar ’n plaasseun’
2012-09-09 01:06
Christine van der Westhuizen
Hy was ’n “Engelse outjie van Durban”, maar Rod Alexander, wat die romantiese hoofrol teenoor Rika Sennett in Snip en Rissiepit vertolk, het diep spore in die Afrikaanse fliekbedryf getrap.
Snip en Rissiepit, die klassieke Afrikaanse DVD-fliek wat Rapport se lesers volgende Sondag gratis saam met hul koerant kry, is ’n heerlike liefdesdrama.
Dit handel oor grootskaalse inmengery met hartseer gevolge wanneer ’n rykmansdogter en armmanskind op mekaar verlief raak.
Ná skool het Alexander sy diensplig by die Valskermbataljon in Bloemfontein voltooi en toe ’n ruk gewerk om geld te spaar om oorsee te gaan.
“Ek wou eintlik Kanada besoek, maar toe ek in Londen kom, besluit ek dít is ver genoeg.”
In Londen het hy aan die Royal Acadamy of Dramatic Arts studeer.
“Hoekom, weet ek nie, want ek het op ’n plaas grootgeword en plaaslewe was in my bloed.”
Hy het goeie ondervinding in die Britse teater-, fliek- en advertensiebedryf opgedoen, onder meer in Hair en The Rocky Horror Show. Toe hy ná vyf jaar na Suid-Afrika terugkeer, het hy ’n rol in Brigadier Films se Kaptein Caprivi gekry.
Daarna het Elmo de Witt hom vir Snip en Rissiepit nader gehark en was hy ook in flieks soos Aanslag op Kariba en Dans van die flamink te sien.
“Ek en Elmo het op die ou end sewe jaar lank saam gewerk,” vertel hy die afgelope week uit sy plaas in Walkerville waar hy al sedert die 1970’s woon. Ja, eenmaal ’n plaasseun, altyd ’n plaasseun.
Alexander het homself gou bekwaam as kameraman, skrywer en regisseur, “want in dié bedryf moet jy alles kan doen”.
Met die koms van televisie het nuwe deure oopgegaan en het hy in reekse soos The Villagers, The Settlers, Vyfster en Taakmag gespeel.
Alexander en akteurs soos Lieb Bester en Hans Strydom was ook in talle oorsese flieks te sien wat destyds deur Duitse maatskappye in Namibië verfilm en oorgeklank is.
Hy verneem van dié flieks word deesdae steeds op Duitse televisiekanale uitgesaai.
Deesdae fokus hy op die vervaardiging van dokumentêre programme, veral historiese en opvoedkundige programme.
“Op skool het ek niks van geskiedenis gehou nie, maar nou is dit ’n passie!” Hy raak veral opgewonde wanneer dit handel oor die Anglo-Boereoorlog en historiese figure soos Paul Kruger, oor wie hy onlangs ’n dokumentêr voltooi het. Die aanbreek van die digitale era het wéér nuwe moontlikhede gebring en Alexander droom van ’n gemeenskapstelevisiekanaal vir Walkerville.
In sy geestesoog maak hy al programme vir dié kanaal, enigiets van landbousake en sportgeleenthede tot vlooimarkte en uitstappies.
* Snip en Rissiepit word met die vergunning van kykNET se Silwerskermreeks aan Rapport se lesers beskikbaar gestel en sal op Sondag 16 September in die koerant ingevoeg word.
Verbode liefde en ’n liefdesdriehoek is die hoofbestanddele wat die fliek Snip en Rissiepit ’n wenresep gemaak het. Rika Sennett, Rod Alexander (middel) en Nic de Jager speel daarin.