Roussos sing nog oor hy wíl
2012-10-13 23:19
- Artikelopsies
- Deel
- Kry Rapport op
Christine van der Westhuizen
Die hare is nou silwer, maar die ruie wenkbroue is nog pikswart en die rasperstem is onveranderd.
Die Griekse sanger Demis Roussos (66) kom einde vanjaar Suid-Afrika toe as deel van sy wêreldtoer.
“Ons probeer al twee jaar om Demis na Suid-Afrika te lok,” sê Frans Swart van Lefra-produksies. “Hy is steeds ’n superster en toer die wêreld vol. Danksy slim beleggings hoef hy nie meer te werk nie, hy sing nog omdat hy wil.”
As hy nie toer nie, pendel Roussos tussen sy woonplekke in Athene en Parys.
Hy is in 1946 gebore in Alexandrië, Egipte. Sy ouers was gegoede Grieke. Toe hy 15 jaar oud was, moes hulle weens die Suez-krisis uit Egipte vlug. In Griekeland het die jong Roussos begin musiek maak om sy gesin te help onderhou.
Hy was lid van die rockgroep Aphrodite’s Child.
As solosanger het hy bekend geword danksy liedjies soos We Shall Dance, Forever and Ever en Goodbye My Love, Goodbye.
Roussos tree op 8 en 9 Desember in Carnival City in Gauteng op, op 12 Desember in die Sand du Plessis-teater in Bloemfontein en op 15 Desember in die Liquifruit-amfiteater in die Paarl. Bespreek by Pacofs (051 447 7772) vir Bloemfontein of Computicket vir Gauteng en die Wes-Kaap.