SA druk lei tot asiel-appèl
2009-09-05 20:49
- Artikelopsies
- Deel
- Kry Rapport op
Loyiso Sidimba en Marthinus van Vuuren
Die Kanadese regering se aansoek om appèl teen die asielstatus van die oud-Kapenaar mnr. Brandon Huntley volg op intense diplomatieke druk deur Suid-Afrika.
Maar dit kan nog lank duur voordat ’n Kanadese hof finaal uitspraak lewer in die saak.
’n Diplomatieke herrie woed die afgelope week nadat ’n Kanadese immigrasie-tribunaal aan Huntley (31) asiel verleen het omdat hy glo weens sy wit vel nie veilig is in Suid-Afrika nie.
Die Kanadese immigrasie-tribunaal se bevinding in Huntley se guns het die debat oor misdaad in Suid-Afrika weer boaan die nasionale agenda geplaas.
In nóg ’n wending het Afriforum gister gesê hy wil as vriend van die hof toetree tot die Kanadese regering se aansoek. Mnr. Willie Spies, Afriforum-woordvoerder, sê hulle wil die konteks stel waarbinne Huntley asiel verkry het.
Mnr. Dawie Jacobs, direkteur: Kanada van die Suid-Afrikaanse departement van internasionale betrekkinge en samewerking, het gister gesê die regering is beswaard omdat die Huntley-bevinding “nie die realiteite op die grond weerspieël nie”.
Jacobs sê ’n immigrasie-tribunaal se bevinding word selde hersien.
Suid-Afrika het dus geen ander uitweg gehad as om die Kanadese regering te vra om appèl aan te teken nie.
Me. Kelli Fraser, woordvoerder van die Kanadese immigrasie-minister, sê die aansoek om ’n wetlike oorsig is op 3 September gedoen: “Dit kan ses maande duur voordat die Kanadese hof besluit of hy die appèl gaan aanhoor.”
Huntley, oorspronklik van die Kaapse woonbuurt Mowbray, het verlede Donderdag asiel in Ottawa verkry nadat hy sedert 2006 onwettig in die land gewoon het.
Huntley het in sy asielaansoek beweer hy is “weens sy wit vel?…? ses of sewe keer” deur swart Suid-Afrikaners aangeval.
Mnr. William Davis, wat Huntley se asiel toegestaan het, het bevind Huntley se littekens op “verskeie dele van sy liggaam, soos sy maag, regteroog, regterkant van sy lyf en sy hande” dien as bewyse van dié aanvalle.
Davis het gesê die bewyse wat Huntley se prokureur, mnr. Russell Kaplan, voorgelê het, wys “die regering en veiligheidsmagte is nie bereid om Wit Suid-Afrikaners teen die vervolging van Swart Suid-Afrikaners (sic) te beskerm nie”.
Kaplan het mediaberigte en statistieke oor plaasaanvalle en verkragting ter stawing van Huntley se saak voorgelê.
Volgens die Kanadese nuusdiens CBC hang daar egter vraagtekens oor die motiewe van Kaplan, self ’n oud-Suid-Afrikaner, nadat dit aan die lig gekom het sy suster, Laura, het vir Huntley getuig.
Me. Kaplan het getuig sy is ook telkemale deur swart mense aangeval en gedreig en haar broer Robert is deur “swart Suid-Afrikaners gemartel en geskiet”. Sy woon ook in Kanada.
Mnr. Craig Stewart, namens Huntley se prokureur, het aan Rapport gesê hy glo nie Huntley se asiel baan noodwendig die weg vir ander asielsoekers nie.
)?Huntley het Vrydag aan die Ottawa Sun gesê hy is verbysterd oor die reaksie wat sy asielstatus ontlok het en hoop “niks loop skeef” met die hersiening van sy aansoek nie.
“Ek kan nie nou teruggaan nie.”
Volgens Spies hoop Afriforum om die konteks waarbinne Huntley asiel verkry het, aan Kanadese owerhede uit te lig.
Spies sê hul besluit spruit uit me. Thandi Modise, ANC-adjunk-sekretaris-generaal, se kommentaar tydens ’n media-onderhoud dat “rasse-aanvalle eerder andersom (wit teenoor swart) geskied”.
“Huntley sou nooit met sy betoog voor ’n internasionale tribunaal geslaag het as dit nie was vir gereelde berigte uit Suid-Afrika wat dui op ’n oordrewe rasse-obsessie by die regering nie,” het Spies in ’n verklaring gesê.