'SA is dík vir die ANC'

Ja, by die stembus het hy ’n meerderheid. Maar die ANC mág nie langer geduld word as regerende party nie, het ’n koor van hoëprofiel-Suid-Afrikaners gister op ’n konferensie van die FW de Klerk-stigting gesê.

Die tema was “Verenig agter die Grondwet”.

“Dáár is Mangaung. En hier is Suid-Afrika,” het Mosiuoa Leko­ta, Cope-leier, in ’n sterk bewoorde toespraak gesê.

“Suid-Afrika sit met mense wat die lewe onmoontlik wil maak vir dié wat ’n uitmuntende regering soek. Die ANC is gestig om Suid-Afrika te demokratiseer, nie om hom te regeer nie.”

Oudpres. FW de Klerk het gesê sy stigting gaan dadelik begin met reëlings vir ’n opvolgkonferensie, in die vorm van ’n bosberaad, “vir samewerking, en om ’n vennootskap te vorm tussen dié wat die Grondwet ondersteun. Ons moet die verskille tussen ons uitwerk.”

Hy het fel kritiek uitgespreek op die ANC “wat die geneigdheid het om sekere dele van die Grondwet te oorbeklemtoon as primêre aspekte en ander dele te onderbeklemtoon en dit as sekondêr te beskou”.

Van die ergste vergrype waaraan die ANC hom skuldig maak, is swart bemagtiging deur onregverdige diskriminasie, die ondermyning van die gesag van howe, die vernietiging van demokratiese instellings en die vernietiging van die onafhanklikheid van die nasionale vervolgingsgesag, volgens De Klerk.

Volgens Lekota is Suid-Afrika, met die ANC aan die spits, op één pad, “en dis ’n katastrofe. Dit kan nie wees dat Nelson Mandela die laaste leier was wat vir die mense opgeoffer het nie. Daarom moet julle gaan stem.

“Die ANC-regering moes al gister uit die pad gewees het. Ek is gereed om na struggle terug te keer.”

Die enigste alternatief vir ’n revolusie is dat Suid-Afrikaners stembus toe gaan, het dr. Paul Graham, uitvoerende direkteur van Idasa, gesê. Korrupsie en die gesag van die reg blyk van die grootste struikelblokke te wees vir ’n gelyke en regverdige samelewing, het die sprekers deurlopend gesê.

Sedert 1994 het die land sowat R675 miljard verloor aan korrupsie en jaarliks gaan sowat R30 miljard verlore weens die regeringstenderstelsel, volgens adv. Paul Hoffman, direkteur van die Instituut vir Verantwoordbaarheid in Suider-Afrika.

Volgens hom bedreig korrupsie stabiliteit in die land.

Michael Bagraim, ’n arbeidskundige, het gesê die Suid-Afrikaanse sakeomgewing voel die ANC vernietig die gesag van die reg.

Volgens adv. Johan Kruger het studente onlangs aan hom tydens ’n lesing gevra wat ’n regter moet doen wanneer hy omkoopgeld aangebied word.

“Dan is my vraag: Is dit ’n heenwysing na die beskouings wat daar in die samelewing oor die Suid-Afrikaanse reg bestaan?”

Die sukses van ’n Grondwet is die mate van respek wat ’n regering toon aan die reg en aan uitsprake. As dit nie gebeur nie, is dit die einde van die regstelsel, het hy gesê.

Dr. Anthea Jeffery van die Suid-Afrikaanse Instituut vir Rasseverhoudinge het gesê daar word op grond van ’n “demografiese kwota” gediskrimineer. Die gevolge van die verlies aan vaardighede kan duidelik gesien word in die ineenstorting van munisipaliteite.

“Die ANC het die armes in ons land in die steek gelaat. Dis tyd dat die regering teruggaan na die ware betekenis van art. 92 van die Grondwet in die toepassing van swart ekonomiese bemagtiging. Die manier waarop dit nou gedoen word, was nooit die bedoeling van die wet nie.”