SAUK se local nie so lekker

Dit word geboekstaaf as ’n amptelike feit: TV-programme in Afrikaans en ander inheemse tale word gruwelik deur die SAUK afgeskeep.

Die SAUK kom nie sy kwotavereistes met plaaslik vervaardigde programinhoud na nie en die uitsaaier verbloem dit deur plaaslike programme te herhaal, het die drukgroep Media Monitoring Africa (MMA) bevind in ’n studie oor die diversiteit van TV-programme wat deur die SAUK uitgesaai word.

Net die herhalings van episodes van 7de Laan maak nou soveel as 37% uit van al die Afrikaanse programme wat deur die SAUK uitgesaai word, het die MMA in sy studie bevind.

Programme wat tydens spitstyd op al drie die kanale van die SAUK vanaf 1 April tot 15 Mei uitgesaai is, is vir die studie gemonitor.

“Ons het bevind dit is veral programme wat eksklusief in Afrikaans, isiXhosa en Tshivenda uitgesaai word, wat die meeste herhaal word,” sê Lethabo Thebe, ’n navorser by die MMA.

“Die herhalings is meestal sepie-reekse met min of geen opvoedkundige waarde,” sê hy.

Ingevolge die SAUK se lisensievoorwaardes moet 55% van die inhoud van die programme wat hy uitsaai Suid-Afrikaans wees, maar volgens Thebe is dit slegs 39%.

Die Onafhanklike Kommunikasie-owerheid van Suid-Afrika (Okosa) kan swaar boetes aan die SAUK oplê wanneer te min inhoud volgens Okosa se punteskaal uitgesaai word.

Herhalings van plaaslike programme uit die SAUK-argiewe is nie veronderstel om te help nie, want heruitsendings tel minder punte. Wanneer ’n program vir die eerste keer herhaal word, tel dit die helfte minder punte as ’n program wat vir die eerste keer uitgesaai word en wanneer dit vir die derde keer uitgesaai word, tel dit nie meer as plaaslike inhoud nie.

Volgens die MMA was 50% van die programme wat deur die SAUK se drie TV-kanale uitgesaai is materiaal wat vir die eerste keer herhaal is en 25% materiaal wat vir die tweede keer herhaal is.

Volgens Thebe beplan die MMA om hul bevindings aan die parlement voor te lê sodat die ware stand van sake by die SAUK aan die lig kan kom.