‘Sekswerk net soos poligamie’

As ’n gesiene gewese adjunkminister van gesondheid haar sin kry, sal net klante van sekswerkers vervolg word en nie sekswerkers self nie.

Nozizwe Madlala-Routledge, tans die ­direkteur van die nie-regeringsorganisasie Embrace Dignity, het Woensdag tydens ’n debat oor die dekriminalisering van sekswerk gesê haar organisasie beywer hom vir die gedeeltelike ­dekriminalisering van sekswerk in Suid-Afrika.

Die debat is aangebied deur die Universiteit van die Witwatersrand se sentrum vir etiek.

Die dekriminalisering van sekswerk was ook onlangs ter sprake toe die ANC-vroueliga dit op die party se beleidskonferensie geopper het.

Troy Martens, woordvoerder van die ANC-vroueliga, het die afgelope week gesê die genderkommissie het by die beleidskonferensie ’n beraad voorgestel met dié kwessie op die agenda.

“Ons wil nie sekswerk bevorder nie, maar ons verstaan dat die huidige wetgewing dit kriminaliseer, terwyl dit nie sekswerk stop nie en die vroue weerloos laat teen verdere uitbuiting.”

Onder die huidige wetgewing kan ’n sekswerker en haar klant in hegtenis geneem word as hulle op heterdaad betrap word.

Madlala-Routledge, wat in 2007 op omstrede wyse deur die Mbeki-administrasie afgedank is weens haar teenstand teen die destydse regering se standpunt teenoor MIV/vigs, sê haar organisasie glo sekswerk is moreel verkeerd.

“Mans het geen reg om seks te koop nie, terwyl vroue die reg het om nie deur ons patriargale samelewing onderdruk te word nie.”
Volgens haar is sekswerk dieselfde as poligamie, “want in albei gevalle gaan dit oor manlike oorheersing”.

Mickey Meji, ’n menseregte- en sekswerkaktivis, sê sy steun die algehele dekriminalisering van sekswerk.

“Dit sal wette skep wat die menseregte van sekswerkers kan beskerm.

“Ons sekswerkers word nie uitgebuit nie. Ons verkoop seks. Ons praat nie hier van kinders nie. Om dit te kriminaliseer sal nie armoede aanspreek of MIV/vigs bekamp nie.”