Seun glimlag na inhegtenismening

Die seun wat vir die moord op die Steenkamp-egpaar en hul dogter op Griekwastad aangekla word, het glo ná sy inhegtenisneming in die polisiemotor geglimlag toe hy oor die radio van sy eie arrestasie hoor.

Só het kol. Dick de Waal, ondersoekbeampte in die saak, gister in die Griekwastadse landdroshof getuig.

De Waal het talle opspraakwekkende stellings gemaak, waaronder:

-  Daar was bloedspatsels op die seun se klere en krapmerke aan sy nek ná die moord.

-  DNS-bewyse toon dat niemand behalwe die verdagte en die drie slagoffers op die moordtoneel was nie.

-  Daar was nooit enige ander verdagtes as die beskuldigde nie.

-  Buiten talle geweerskote, is mnr. Deon Steenkamp en sy dogter Marthella albei ook met ’n stomp voorwerp oor die kop geslaan.

-  Ná sy inhegtenisneming het die seun pal BBM’s gestuur, onder meer een aan ’n meisie wat lui: “Jirre, ek weet nie wat om te doen nie. Hulle het reeds 'n docket vir my.” Die meisie het in respons gevra of daar enige vingerafdrukke was en die seun het teruggeskryf, “Nee, net myne.”

-  Die slagoffers is almal in die kop geskiet, in die styl van ’n teregstelling.

- Die seun het tot en met sy inhegtenisneming nog vuurwapens gehad en het onlangs koedoes gaan jag.

- Die seun het van dag een af geweet hy is die enigste verdagte.

- Die dag na die moord is 'n T-hemp in die seun se kamer gevind met Marthella se bloed daarop.