Skones stamp kop
2012-12-29 23:17
- Artikelopsies
- Deel
- Kry Rapport op
Julian Jansen in kaapstad
’n Hartebreker (22) het verlede naweek ’n nag in die polisieselle deurgebring nadat die neus van sy vriendin (52), ’n ouma en voormalige Mev. Suid-Afrika-finalis, in ’n stryery gebreek is.
Die Pretorianer, Justin Hoffman, Mnr. Wes-Kaap, en sy vriendin van 12 maande, Mimi Reyneke, het in haar huis in Durbanville stry gekry nadat Hoffman die aand uit was.
Reyneke is ’n gewese Mev. Wes-Kaap en Mev. Suid-Afrika-finalis en het ook skoonheidstitels in die Amerikaanse deelstaat Arizona verower, het sy trots aan Rapport vertel.
Hoffman het volgens Reyneke verlede Vrydagaand dronk by die huis opgedaag.
“Hy het op my geskree en gevloek en my kleinkind, wat met ’n hartprobleem sukkel, voor die bors gestamp en my met die kop gestamp dat my neus gebreek het.”
Haar bewyse hiervoor is die foto hiernaas wat intussen by die polisie ingedien is.
’n Doktersverslag wat in Rapport se besit is, meld ’n “vermoedelike neusbreuk”.
Sy het die polisie ontbied, wat Hoffman weens beweerde huishoudelike geweld in hegtenis geneem en in die Durbanville-polisieselle toegesluit het, waar hy die nag deurgebring het.
Hy is Saterdagaand op borgtog van R300 vrygelaat en sy saak is Maandag deur die landdros uitgegooi. Reyneke hoop die indien van bewyse by die polisie sal daartoe lei dat hy aangekla word.
Hoffman, wat gemeenskapsdiens doen terwyl hy die provinsiale skoonheidskroon dra, het by navraag gesê dit was ’n fratsongeluk.
“Ek het haar gesê: ‘Hoor hierso, ek slaan jou sommer met die kop.’ My kop het haar toe per ongeluk geraak. Daar is nie ’n merkie op haar nie.”
Juanita Smit, direkteur van Role Models SA, het by navraag gesê indien enige titelhouer in hul skoonheidskompetisies skuldig bevind word aan aanklagte van aanranding of huishoudelike geweld word hulle van hul titel gestroop.