Skool, ouers koop self boeke
2012-10-13 23:19
Die nasionale departement van basiese onderwys kry ’n volslae druipsyfer vir die aflewering van handboeke in Limpopo vanjaar, maar daar is skole wat nie toegelaat het dat hul leerlinge daaronder ly nie.
Een van dié skole is die Mohlakamotala High School buite Modimolle (Nylstroom). Dít is danksy ervare en toegewyde onderwysers, sê Harry Malan, ’n lid van die beheerliggaam wat tot middel laas jaar skoolhoof hier was.
Vrydag was die hooggeregshof in Pretoria se sperdatum aan die departement vir die aflewering van vanjaar se nuwekurrikulum-handboeke (Caps) vir gr. 1, 2, 3 en 10 in Limpopo.
Teen Donderdag het Mohlakamotala sowat die helfte van sy vakke se boeke van die departement ontvang.
Twee vakke se boeke is in Februarie afgelewer, vier in Junie, een in Julie en nog een eers die afgelope week.
Die skool het egter danksy onder meer inkomste uit sy private koshuis self handboeke gekoop. Die ouers is ook versoek om enkeles te koop en onderwysers het ook ou handboeke gebruik.
“Die gr. 10’s se werk is op datum, ons het nie ’n inhaalprogram nodig nie,” sê Malan. Hy sê handboeke is nie hul grootste probleem nie. “Sonder ’n handboek kan ’n mens nog ’n plan maak, maar sonder ’n onderwyser nie.”
Vyf vyf van die skool se 19 poste is vakant, waaronder die hoofpos.
By ander Limpopo-skole wat Rapport besoek het, is die gebrek aan boek-aflewering ook net een van talle probleme.
By ’n hoërskool waar die meeste ouers seisoenale plaaswerkers is met ’n maandelikse salaris van sowat R1 000, was vier vakke se boeke Donderdag uitstaande. Onderwysers het wel handboeke gekry. “Wanneer ons geld vir papier het, fotokopieer ons die belangrikste werk,” sê ’n onderwyser.
Gr. 10-leerlinge het in die onlangse vakansie ekstra klasse gekry, maar volgens ’n onderwyser kan van die gr. 10-werk eers in gr. 11 kan aandag kry.
By ’n laerskool in ’n landelike gebied hou onderwysers baie van die nuwe werkboeke vir leerlinge, maar die boek vir die eerste twee kwartale was laat.
“Ouers hier het nie tydskrifte of ander hulpbronne in hul huise nie.”
Groot leesboeke vir onderwysers is in Junie afgelewer, maar klein leesboekies vir leerlinge eers die einde van die derde kwartaal, en toe boonop te min.
Die departement het nie ’n inhaalprogram vir gr. 1 tot 3 nie. Die skool wil deur ’n langer skooldag werk inhaal.
Die departement het Vrydag gesê alle boeke was teen Donderdag afgelewer.