So byna pik dodelike Kaapse kobra DA-LP
2010-03-13 23:20
- Artikelopsies
- Deel
- Kry Rapport op
Om jou voordeur oop te maak en ’n uiters giftige Kaapse kobra teë te kom met die kop wat bak staan, gereed om te pik, dertig sentimeter van jou gesig af, is sekerlik niemand se idee van ’n goeie Vrydagoggend nie.
Dit was presies hoe dr. Junita Kloppers-Lourens, DA-LP van Pretoria en die amptelike opposisie se woordvoerder oor basiese onderwys, se Vrydag verlede week begin het.
Gedurende die week gebruik sy die redelik basiese huisvesting wat die staat in Akasiapark, Goodwood, aan parlementslede verskaf. Die ietwat afgeleefde toestand van die huise het al dikwels nuus gemaak.
“Daar is ’n gaping tussen die voordeur en die vloer wat ek gewoonlik met rubbermatjies opvul om die stof uit te hou,” het Kloppers-Lourens by navraag aan Rapport vertel.
“Toe ek afbuk om die vullissak uit te sit, sien ek die slang dertig sentimeter van my gesig af. Die beweging van die slang se kop, soos hy bak maak om te pik, was al wat my bedag gemaak het.
“Instink het oorgeneem. Ek het teruggespring en die deur toegeslaan. Ek was in totale skok. My brein het vyf minute lank stilgestaan.”
Toe bel sy haar kollega, me. Desiree van der Walt, DA-leier in Limpopo en ’n bekende raakvatter, wat die polisie laat kom het.
En dis waar ’n verdere drama begin het, want die kobra het hom toe tussen die veiligheidshek en die voordeur ingewurm, met sy kop in die gaping onder die deur wat Kloppers-Lourens gewoonlik met die rubbermatjies bedek.
Die kobra, een van Suid-Afrika se giftigste slange, is deur die polisie verwyder en die huis is vir slange gevee, want daar is mos dikwels twee?…
As jy deur ’n Kaapse kobra gepik word, tree verlamming in en kan die dood binne twee uur volg.
Verskeie mense het aan Kloppers-Lourens uitgewys dat die slang sy opwagting gemaak het in dieselfde tyd dat sy haar in ’n klipharde stryd met die ANC-ondersteunende onderwysvakbond Sadou bevind, maar sy laat haar nie daardeur beïnvloed nie.
“Ek is ’n gelowige mens en ek is deur die genade gespaar. Ek moet vreesloos voortgaan. Ek sal geen oomblik afwyk van die DA se veldtog om Sadou te takel en onderwys tot ’n noodsaaklike diens te verklaar nie.”
Sy het darem haar sin vir humor behou: “In die politiek moet jy baie slange trotseer. Party is duidelik giftiger en gevaarliker as ander.”
- Rapport