Só word geveg vir Afrikaans se regte

’n “Vegplan” van miljoene rande vir Afrikaans is eergister deur die beweging Solidariteit aangekondig.

Dit kom in reaksie op die jongste weergawe van die Wetsontwerp op Suid-Afrikaanse Tale wat staats­departemente verplig om minstens drie amptelike tale te gebruik, waarvan twee inheems moet wees – Afrikaans uitgesluit.

Só lyk Solidariteit se vegplan vir Afrikaans:

* Regsweë: Solidariteit gaan die grondwetlikheid van die voorgestelde wetsontwerp in die hof toets, sou dit as wet aanvaar word.

* Die behoud van Afrikaanse skole: Solidariteit se burgerregte-inisiatief, AfriForum, het reeds met ’n veldtog begin teen pogings om Afrikaans uit skole te verdring.

* Beurse aan Afrikaanse studente: Solidariteit Helpende Hand gaan vanjaar meer as R7 miljoen aan Afrikaanse jongmense toeken – binne tien jaar R30 miljoen jaarliks.

* Afrikaans as wetenskap- en onderrigtaal: ’n Kampus waar Afrikaanse opleidingsinstellings gehuisves gaan word, word teen R150 miljoen gebou.

* Afrikaans terug in die hoofstroom-ekonomie: Dit word as ’n begin gedoen deur die korttermynversekeraar VirSeker.

* Afrikaans in die gedrukte media: ’n Eie uitgewery, Kraal-uitgewers, word bedryf.

* Afrikaans op die internet: Dit word gedoen deur Maroela Media, ’n internetkuierplek.

* Afrikaans in die werkplek: Veldtogte soos dié waar Afrikaanse eksamenvraestelle vir finansiële adviseurs beskikbaar gestel word.