Stellenbosch het meeste ‘loslappies’
2012-09-22 23:13
Stellenbosch se getroude, heteroseksuele vroue het dié dorp nou “Skelmbosch” herdoop.
Dis nie net skelmpies van die teenoorgestelde geslag wat op hul spyskaart is nie: Hulle jag gereeld ’n ontroue “selfdegeslag-ervaring”.
So sê Julianne Robicheau, die woordvoerder van Noel en Amanda Biderman, uitvoerende hoofde van Avid Life Media.
Avid Life Media is die eienaar van AshleyMadison.com, ’n internasionale internetafspraakdiens vir getroudes wat plesier buite hul eie huweliksbed soek.
Van alle dorpe in Suid-Afrika is dit Stellenbosch se getroude, heteroseksuele vroue wat die ontrouste is. AshleyMadison.com, wat in Toronto, Kanada, gesetel is, het drie maande gelede sy dienste na Suid-Afrika gebring.
Volgens Robicheau het 115 000 Suid-Afrikaanse getroudes sedertdien aangesluit. Wêreldwyd het die webwerf 15 miljoen lede, van wie gemiddeld 68% mans en 32% vroue is.
Maar op Stellenbosch, waar 1% (sowat 1 000) van sy nagenoeg 110 000 inwoners aan AshleyMadison.com behoort, lyk die statistieke anders, want ’n hele 41% van die Stellenbosse rondslapers is vroue, sê sy.
Die vroue van nog twee Wynlandse dorpe, die Paarl en Worcester, is ’n kortkop agter dié van Stellenbosch.
Ander dorpe en voorstede met ’n groot vroue-lidmaatskap is Witrivier, Louis Trichardt, Irene, Delmas, Vanderbijlpark, Randfontein, Brits en Brackenfell.
Stellenbosch se getroude vroue se vryery met dieselfde geslag is nie vreemd nie, sê Robicheau.
AshleyMadison.com, wat sy dienste al in 23 lande aanbied, “het lede in elke land wat ’n affair met iemand van dieselfde geslag wil hê. Dis waar vir Stellenbossers en oral in die wêreld.
“Ons het sowat 300?000 vroue op ons ledelys wat buite-egtelike selfdegeslag-verhoudings versoek.
“Dis vroue wat hulself as heteroseksueel beskryf, maar belang stel in ’n ervaring met iemand van dieselfde geslag; iets anders as hul eggenoot!”
Dit oortref die getal getroude mans wat buite-huwelikse plesier by ander mans soek met sowat 50 000.
Dorpelinge soek na skelm plesier “omdat daar in klein plattelandse dorpies soos Stellenbosch ’n baie kleiner netwerk mense is met wie jy daagliks in aanraking kan kom. Die internet het dinge verander.
“Ontmoetingsnetwerke gee vroue die geleentheid om ander mense in buurdorpe of -stede te ontmoet, of dié wat hul dorp besoek. Duisende van ons Suid-Afrikaanse lede is besig om affairs te reël met mense buite hul woonbuurte. Dit sluit in mense met heeltemal ander agtergronde as hul eie.”
Robicheau sê hul netwerk fokus nét op buite-huwelikse verhoudings, “vir daardie mense wat weens hul lewensomstandighede diskreet ’n ander minnaar as hul eie verlang.
“Toe ons die ontmoetingswebblad in 2002 begin het, het ons ontdek dat sowat 25% van ons lede nie enkellopend was nie.
“Ons het besluit om ’n spesiale gemeenskap te bou – een waar eendersdenkende volwassenes diskrete buite-huwelikse verhoudings kon aanknoop.
“Dis verreweg verkieslik bo dit wat op sommige enkelloper-afspraakwebblaaie gebeur.”