‘Stig weer ’n Christelike universiteit’

Daar is ’n behoefte aan ’n Christe­like universiteit in die land.

So het sprekers gister aangevoer by ’n seminaar in Pretoria oor die lewensvatbaarheid van ’n Christelike universiteit in Suid-Afrika.

Dit is veral nodig nadat die destydse Potchefstroomse Universiteit vir Christelike Hoër Onderwys (tans die Noordwes-Universiteit) sy Christelike karakter verloor het.

Prof. Ponti Venter van die Noordwes-Universiteit sê die destydse Potchefstroomse Universiteit het sy Christelike karakter verloor toe die bestuur besluit het die universiteit moet mededingend wees en geld maak. “Dit was nie (wyle prof.) Kader Asmal (destydse minister van onderwys) wat die universiteit gesekulariseer het nie,” het Venter gesê.

Volgens hom moet Christelike universiteite hervestig word, maar dit moet verder as Afrikaans strek en meertalig wees. “Potch kan weer Christelik word, mits ons swart gereformeerdes se steun kry.”

Ook Flip Buys, uitvoerende hoof van Solidariteit, sê daar is ’n groeiende behoefte aan ’n Christelike universiteit.

“Vir ons gaan dit oor Afrikaans en die Afrikaner. Al manier vir ons om te kan oorleef, is om baie goed opgelei te word. Toelating op grond van ras en taal is ’n werklikheid en daarom is dit baie moeilik om in Afrikaans opvoeding te kry.”

Buys sê ’n Christelike universiteit gaan nie regeringsteun kry nie en moet ’n gemeenskapsprojek wees. Volgens hom vaar die staat swak met hoër opleidingskolleges.

Pieter Bisschoff, uitvoerende hoof van die Akademie Reformatoriese Opleiding en Studies (Aros), wat die seminaar met sy Juventus-jeugvereniging aangebied het, sê ook daar is ’n geweldige behoefte by die jeug aan Christelike wetenskaplike opleiding.

Hy sê ’n tersiêre instelling met ’n geloofsoortuiging kan weens die regering se multigodsdienstige beleid nie op regeringsteun staatmaak nie.

“Ons moet dus uitnemende onderrig aanbied en innoverend wees. As ons suksesvol is gaan ons studente oplei wat met hul Christelike waardes in alle sektore van die samelewing sal kan werk.”

Aros is ’n Christelike private tersiêre opleidingsinstelling vir onderwysers.

Pieter Mulder, leier van die Vryheidsfront Plus, het by die seminaar aangevoer “owerheidsteun vir projekte soos dié is nie tans ’n prioriteit nie”. “As die staat geld gee, sluk hy jou in en skryf hy aan jou voor wat om te doen.”