Suid-Afrikaners vul gate in Nieu-Seeland
2012-10-27 23:58
Jacques Steenkamp en Johan Coetzee in Johannesburg
Duisende Suid-Afrikaanse ambagslui stroom na Christchurch in Nieu-Seeland om die stad te help herbou ná die verwoestende aardbewing van Februarie verlede jaar.
Die land benodig 58 000 geskikte immigrante wat kan help omdat Nieu-Seelandse ambagslui toenemend vir beter werkgeleenthede na Australië uitwyk.
Volgens Sharon Yerman, besturende direkteur van New Zealand Migration Services, is R37 miljard vir die herbou van Christchurch begroot.
Die hele stadskern word oorgebou en van die voorstede is gesloop en moet ook herbou word.
In woonbuurte wat behou kan word, moet van die huise wat nou onder die nuwe vloedlyn val met byna ’n meter verhoog word.
’n Voorman by ’n boumaatskappy in Christchurch verdien meer as R500 000 per jaar, insluitende voordele wat ’n private pensioenfonds, voertuig, rekenaar en selfoon insluit.
Dieselfde voorman verdien sowat R150 000 in Suid-Afrika.
Emigrasiemaatskappye in Suid-Afrika word oorval deur aansoeke en navrae.
“’n Nuwe verblyf- en visumproses is ook in Nieu-Seeland ingestel, wat aansoeke aansienlik bespoedig.
“’n Aansoek om vaste verblyfregte neem deesdae tussen vier en sewe maande pleks van 12 maande soos voorheen.
“’n Werkvisum word ook nou binne 4 tot 15 dae toegeken as daar geen mediese probleme of misdaadgeskiedenis is nie,” sê Yerman.
Nieu-Seeland wil vanjaar minstens 58 000 geskikte immigrante lok.
In die afgelope 12 maande tot Junie 2012 het ’n rekordgetal van 53 763 Nieu-Seelanders (14,4% tegnici en vaklui) na Australië geëmigreer, die meeste van hulle tussen 20 en 29 jaar oud.
* Jaco de Jongh (29), ’n oud-Suid-Afrikaner wat al ses jaar lank in Nieu-Seeland woon en werk, sê sy skoonpa en talle van sy vriende het die land verlaat om in Australië te gaan werk.
De Jongh sê Nieu-Seelanders verdien dubbel daar as wat hulle in hul eie land verdien.
“’n Minister hier het onlangs gesê buitelanders is bereid om langer ure vir minder geld te werk, maar dat daar duisende jong Nieu-Seelanders is wat nie werk nie en vir wie die staat sorg. Hulle wou die mense gebruik, maar hulle is nie gewillig nie,” sê De Jongh.
Die werkloosheidskoers in Nieu-Seeland staan tans op 6,8% in vergelyking met 24,9% in Suid-Afrika.
De Jongh sê al is alles duurder as in Suid-Afrika, sukkel niemand nie en hoef hulle nie bekommerd te wees oor geld nie.
“In Suid-Afrika moet mense beplan om deur die maand te kom, hier kan ons spaar en lekker vakansies hou. Niemand hoef hier te werk vir ekstra geld nie en hier is nie bedelaars op straat nie. Ons lewe gemaklik en baie lekker,” sê De Jongh.
Suid-Afrikaners emigreer volgens Yerman eerstens om finansiële redes, tweedens vir beter opvoeding vir hul kinders en laastens weens vrees oor groeiende misdaad en korrupsie.
Nieu-Seeland is streng met sy keuring van immigrante.
’n Aansoeker met ’n misdaadgeskiedenis of ’n geskiedenis van gesinsgeweld word outomaties gediskwalifiseer.
Sekere mediese gevalle word ook afgekeur, soos byvoorbeeld ’n kind met Downsindroom omdat die staat verantwoordelik is vir die mediese uitgawes.