Supersport sê oor Ashwin

Ja, die oud-Springbok Ashwin Willemse is betrek by ’n omstrede transaksie vir swart ekonomiese bemagtiging (SEB) en ja, kort ná onthullings hieroor het hy verlof gevra by sy werkgewer, SuperSport. 

Maar volgens Clinton van der Berg, woordvoerder van dié TV-sportdiens, is Willemse nié afgedank nie. 

Kort nadat M-Net se ondersoekspan by Carte Blanche in Oktober onthul het Willemse was die begunstigde van ’n SEB-transaksie van die mynreus Gold Fields wat vir armes bedoel was, het Willemse van die lug verdwyn. 

Die transaksie, wat in 2010 aangekondig is en etlike miljarde rande werd is, is destyds “bemark” deur die veroordeelde bankrower Gayton McKenzie en sy boesemvriend Kenny Kunene. 

Kunene het op sy beurt berug geword toe hy by ’n partytjie soesji van die lywe van halfkaal modelle geëet het. 

Die bestemde begunstigdes was voorheen benadeeldes wat nog min ervaring van die mynbedryf het. Senior regeringslui is ook uitgesluit. 

Tog is politici soos Baleka Mbete, nasionale voorsitter van die ANC, ook deur Carte ­Blanche by die transaksie betrek, asook die rugbyheld en aanbieder Willemse. 

Volgens Van der Berg het Ashwin SuperSport kort ná die betrokke Carte Blanche-program gevra of hy met verlof kan gaan. 

“Ashwin is nie gevra om SuperSport te verlaat nie. Ons was altyd bewus van sy betrokkenheid by die SEB-transaksie. 

“Hoewel hy ’n vennoot is in die groep wat in die program genoem is, was geen van sy transaksies onbehoorlik of onwettig nie. 

“Gegewe dat ons eersteklas-rugbyseisoen verby is, was nie hy of enige van ons ander aanbieders op die lug nie. Ashwin is een van ons gewildste aanbieders en is in Februarie terug wanneer die Super Rugby begin,” het Van der Berg gesê. Ashwin was nie beskikbaar vir kommentaar nie.