Swaar arms van die gereg
2012-10-13 23:19
- Artikelopsies
- Deel
- Kry Rapport op
Gesette polisielede wat agter booswigte aanwaggel en soms die stryd teen sowel vetsug as misdaad verloor, kan nie gedwing word om fiks te word nie, want dit sal hul menseregte skend.
Só het die polisieminister, Nathi Mthethwa, se segsman die afgelope week gesê nadat die minister ’n beroep op “vettie boem-boems” gedoen het om oorlog teen oortollige kilo’s te verklaar.
“Ons kan niemand verplig om ’n fikse polisieman of -vrou te wees nie. Dit sal ’n vergryp van hul regte wees,” het Zweli Mnisi, ministeriële woordvoerder, aan Rapport gesê.
Volgens Mnisi doen die minister wel ’n beroep op lede om gesond en fiks te word, want “vettie boem-boems kan nie misdadigers vang nie”.
Mthethwa se wekroep kom nadat hy Dinsdag in ’n skriftelike parlementêre antwoord gesê het 237 uit 714 (een uit drie) lede by polisiekantore in Durban se westelike voorstede en omliggende gebiede het teen 1 Oktober hul fiksheidstoetse gedop.
Dié druipelinge het ’n joernaal gekry met die ideale liggaamsmassa-indekssyfers, ’n handleiding vir oefening en dieet en die polisie se vereiste standaarde wat in herevaluerings gehaal moet word.
Rapport kon nie die inhoud van die standaarde, handleidings of die geskikte liggaamsmassaindeks by Mnisi bevestig nie.
Navrae oor fiksheidsaangeleenthede by die provinsiale owerhede, die polisie se hoof van gesondheidsdienste en opleiding en Mnisi self het niks opgelewer nie.
Mthethwa het op 12 Oktober 2010 dieselfde vraag van Gareth Morgan, DA-LP, beantwoord deur te sê die handleiding en hulppakket is op 22 Maart 2010 bekend gestel, maar dat die Wêreldbeker-sokkertoernooi die uitrol daarvan vertraag het.
Stocky Ngwenya, die polisie-vakbond Popcru se onderhandelaar by die bedingingsraad vir veiligheid en sekuriteit, het by navraag gesê die finale handleiding is nog nie daar nie.
Gareth Newham van die Instituut vir Sekerheidstudies (ISS) sê beamptes sou ’n kontrak oor standaarde moes onderteken as die fiksheidsevaluerings deel is van lede se prestasie-ooreenkomste.
“Sodra nuwe beleid of prosedures indiensneming raak, moet dit eers by die bedingingsraad onderhandel word,” sê hy.
Volgens Ngwenya werk Popcru en die SAPD-onderhandelaars aan die handleiding.
“Ons wag nog op terugvoer op ons voorstelle. Ons lede sê hulle word in die provinsies daaraan onderwerp, maar daar is nie ’n behoorlike stelsel om die program te reguleer en meet nie. Ons lede moet weet wat van hulle verwag word om aan die standaarde te kan voldoen.”
Verskeie polisielede by die parlement – ’n nasionale sleutelpunt – weet nie van ’n handleiding, joernaal óf vasgestelde fiksheidstandaarde nie.