Talle vrae ná twee vennote se skietdood

’n Skietery in die Kaapse middestad waarin twee mans, Herman Pretorius (40) en sy gewese sakevennoot, Julian Williams (36), dood is, het baie vrae gelaat.

’n Kleinneef van Pretorius sê Pretorius was onlangs op Riversdal. Hy het toe sy besorgdheid uitgespreek oor dividende van Wil­liams se SA Superalloys wat nie aan aandeelhouers uitbetaal word nie.

Alfie Pretorius beskryf Herman Pretorius as ’n “doodgoeie, gewone man wat baie vrae gelos het met die skietery” in die kantore van die Basileus Capital in die Kaapse middestad.

Pretorius, ’n gewese vennoot en ’n private verskansingsfondsbestuurder van Welgemoed, en ­Wil­liams, was in ’n heftige stryery toe Pretorius hom noodlottig in die maag en nek geskiet het.

Pretorius het hom daarna in die kop geskiet en is op pad na die hospitaal oorlede.

Pretorius het talle beleggers in die Suid-Kaap en Weskus.

’n Werker was Donderdag buite die gebou en in ’n telefoniese gesprek met ’n kollega in die kantoor, toe sy Williams hoor gil gevolg deur ’n harde knal. Sy het na die kantoor in die Icon-gebou gehardloop waar Williams en Pretorius in bloedplasse gelê het.

Pretorius sou Donderdagaand Weskus-aandeelhouers op ’n vergadering in Moorreesburg toespreek. Die vergadering is op kort kennisgewing afgelas omdat hy Williams wou spreek.

Die laaste maande is wyd berig dat die twee sakemanne woorde gehad het oor geld wat glo uit SA ­Superalloys, waarvan Williams ’n direkteur was, aan aandeelhouers betaal moes word.

Williams en Pretorius was voorheen vennote in die Abante Statis­tical Arbitrage.