Tina stres nie, maar koes vir die LP’s

Tina Joemat-Pettersson, minister van landbou, bosbou en visserye, het ontken stresverlof was die rede waarom sy twee vergaderings van ’n parlementêre komitee misgeloop het waartydens sy dringende vrae moes beantwoord.

Dié “gerug” is deel van ’n “DA-smeerveldtog teen haar” omdat ’n “naïewe” Annette Steyn, DA-woordvoerder oor landbou, “gefop” is deur “kwaadwillige skinderstories”.

So lui ’n SMS wat die minister Woensdag uit haar siekbed aan familie en vriende geSMS het.

Steyn het aan ­Rapport gesê sy het Woensdag ’n oproep en SMS’e van ­die minister gekry omdat sy (Steyn) Joemat-Pettersson se twee kinders “paniekbevange gelaat het” oor hul ma se toestand.

Lulu Johnson, ANC-voorsitter van die portefeuljekomitee oor landbou, bosbou en visserye, het aan Rapport gesê hy het in die laaste vergadering (Dinsdag 18 September) gesê die minister is siek.

“Ek het nooit gesê sy ly aan stres nie,” het hy gesê.

Die minister verwys hierna in haar SMS.

Hy het Woensdag met die minister gepraat en aan Rapport gesê “sy’s fine”, by die werk, en sou eergister by die ANC se nasionale uitvoerende komiteevergadering wees.

Palesa Mokomele, Joemat-Pettersson se woordvoerder, het Donderdag aan Rapport gesê die minister is wel vir twee weke tuis met brongitis.

Volgens Steyn het die minister dit voorheen duidelik gestel sy sal nié weer voor “die spesifieke” komitee verskyn nie.

Johnson het op Dinsdag 11 September aan LP’s gesê die minister het ’n oorkwaal en dat sy met haar motor Kaap toe ry, want sy mag nie vlieg nie. Sy sou te laat wees vir hul vergadering waarop sy dringende vrae moes beantwoord.

Dit was die tweede “uitstel”.

Intussen is Selby Bokaba, departementele kommunikasiehoof, geskors. Hy het blykbaar sonder toestemming met die media gepraat en inligting aan die openbare beskermer se ondersoekspan verskaf.

Ander personeellede wat die afgelope twee maande weg is:

Ronika Ramanand, die minister se private sekretaresse, is geskors weens die beweerde uitlap van inligting;

Dr. Mono Mashaba, die adjunk-direkteur-generaal van visserye, wat op die vergadering van 11 September vir Joemat-Pettersson moes instaan voor vies LP’s, het bedank;

Rams Mabote, spesiale adviseur en vertroueling, het bedank ná aantygings dat hy inligting uitgelek het;

Langa Zita, direkteur-generaal, is “om administratiewe redes” geskors en het sedertdien ’n skeidingsooreenkoms met die minister gesluit.