Toekoms troebel met net matriek

Matrieks moet gaan kyk waar vaardigheidstekorte is en in watter sektore van die ekonomie daar groei is – en hulle dan in dié beroepsrigtings bekwaam.

Dit is kenners se raad aan jong skoolverlaters.

“Ons ekonomie vereis al hoe meer dat mense die nodige kennis moet hê en moet weet hoe om dit toe te pas wanneer hulle die arbeidsmark betree,” sê Jacques Botha van die African ­Foresight Network.

“As jy dít kan doen, is daar vir jou geleenthede in die arbeidsmark. Maar as jy met net ’n matrieksertifikaat werk soek, is die kans groot dat jy teleurgesteld gaan wees,” sê hy.

Dit is omdat ’n matrieksertifikaat nie meer beskou word as ’n kwalifikasie wat jou vir die moderne werkomgewing voorberei nie, sê hy.

Entrepreneurskap bly belangrik, watter beroepsrigting ook al gevolg word, omdat mense vir hulself werk kan skep.

Botha sê die toerismebedryf en die lewering van dienste is groeiende sektore in die ekonomie.

Volgens CNN en Forbes is daar ’n groeiende vraag in al die vertakkings van die rekenaar- en finansiëledienste-bedryf.

Die top-10 Beroepe met die hoogste vlakke van vaardigheidstekorte in SA in 2013:

1. Ingenieurs
2. Bestuurders
3. Geskoolde vaklui
4. Arbeiders
5. Korporatiewe uitvoerende bestuurders
6. Onderwysers
7. Prokureurs
8. Sekretaresses, administratiewe assistente en kantoorpersoneel
9. Tegnici
10. Ouditeure en finansiële personeel

Bron: Moneyweb/Man­powerGroup