Trojaanse perd bedreig Zille

Ontevrede lede van die DA maak hulle gereed om Helen Zille oor drie jaar uit die kussings te lig.

Maar vir eers is sy nog veilig, sê hulle, want hulle het die “Zille-handelsnaam” vir die algemene verkiesing in 2014 nodig.

Intussen gaan hulle by die DA se kongres in November twee van hul “eie” benoem om teenoor twee van Zille se regterhande – James Selfe, voorsitter van die federale bestuur, en Wilmot James, nasionale voorsitter – op te staan.

Die ontevredenes hoop dat diegene in Zille se binnekring wat hulle goedgesind is die kanse sal verswak dat sy by die DA-kongres in 2015 eenvoudig haar opvolger sal “salf”.

By dié kongres sal hulle Zille die stryd aansê.

Wie hulle as haar opvolger wil hê, is onbekend.

Zille het al laat blyk dat sy die tuig wil neerlê. Sy het tot onlangs toe nog ’n paar vooraanstaande mense genader, onder wie die akademikus en aktivis dr. Mamphela Ramphele.

Maar sonder sukses.

’n Ontevredene wat liefs anoniem wil bly omdat die plan nog in ’n vroeë sta­dium is, sê Athol Trollip, DA-LP, is genader om Selfe teen te staan.

Trollip het verlede jaar die trekpas gekry toe die parlementêre koukus Lindiwe Mazibuko as parlementêre leier verkies het.

Nog ’n DA-LP, Masizole Mnqasela, sal James die stryd aansê. Mnqasela moes Zille onlangs om verskoning vra ná ’n onderonsie tydens verlede jaar se koukusverkiesingsveldtog.

Drie openbare DA-verteenwoordigers sê hulle is ontevrede met James, wat ook koukus-voorsitter is, want al is hy ’n goeie akademikus, is hy nie ’n buitengewone politikus nie.

“Ons moet sorg dat wanneer ons oor transformasie en diversiteit in die party praat, dit nie net gaan oor velkleur of om na die pype te dans van diegene in die paleise van mag nie,” sê een.

Trollip het bevestig hy is genader, “maar ek het nog nie besluit nie”.

Mnqasela het gesê: “As ek benoem word, sal ek dit aanvaar, maar die proses het nog nie begin nie.”

Die teenstand teen Zille kom te midde van ontevredenheid oor hoe besluite in die party geneem word.

’n DA-LP sê sommige in die parlementêre koukus was so ongelukkig dat die DA se plan vir werkskepping en ekonomiese groei, wat deur James gedryf is, nie voor die bekendstelling aan hulle voorgelê is nie dat hulle die bekendstelling verlede maand in Pretoria geboikot het.

’n Ander een sê partyleiers het dié beleid, wat as ’n vroeë verkiesingsveldtog bestempel word, bekend gemaak sodat hulle in November herverkies moet word om kontinuïteit in die veldtog te verseker.

Selfe sê die komitee wat die komende kongres moet reël, vergader vandeesweek om die planne op te stel wat in September aan die federale uitvoerende komitee voorgelê gaan word.

Die party het nog nie besluit wanneer die benoemings sal begin nie.