Twee vermis in vloede
2013-01-20 00:02
- Artikelopsies
- Deel
- Kry Rapport op
’n Verkeersbeampte van Mpumalanga en ’n agtjarige seun het waarskynlik verdrink nadat hulle gister by Tonga naby Komatipoort deur vloedwater meegesleur is.
Die soektog na albei slagoffers is gistermiddag afgelas omdat dit vir soekspanne te gevaarlik geraak het om hulle in die tierende Lomatirivier te soek.
Twee voertuie, waaronder die verkeersbeampte s’n, het omstreeks 02:00 Saterdag op ’n laagwaterbrug oor die Lomatirivier gestrand geraak.
Die verkeersbeampte en die twee insittendes van die ander motor het op hul voertuie se dak geklim.
Ten aanskoue van polisielede wat die mense probeer red het, is albei voertuie van die brug afgespoel.
Die verkeersmotor se blou ligte het nog ’n paar minute lank onder die water geflits.
Die twee insittendes van die ander motor, ’n man en vrou, het in die middel van die rivier aan riete vasgeklou.
Hulle is later deur ’n lugmaghelikopter uit die kolkende massa water gered.
’n Ambulans wat omstreeks 01:00 Saterdag op die Pivo-pad in Tonga na ’n mediese noodgeval op pad was, is ook deur die Lomatirivier meegesleur.
Die twee ambulansmanne kon uit die voertuig kom.
Hulle het aan boomtakke gehang totdat die polisieduikers onder die bevel van kapt. Pottie Potgieter hulle gered het.
Drie mense is by die Mangosuthu-gebied naby Piet Retief dood toe hulle tydens ’n swaar donderstorm deur weerlig getref is.
Op ’n plaas naby Piet Retief is ’n man dood toe sy modderhuis weens die swaar reën inmekaargestort het.