UGO se eerstejaars het baie meer hulp nodig
2010-03-06 23:03
- Artikelopsies
- Deel
- Kry Rapport op
Die nuwe kurrikulum se eerste groep matrieks het klaarblyklik verlede jaar as eerstejaarstudente baie meer hulp nodig gehad om die mas op te kom.
Die Universiteit van Pretoria (UP) sê nadat die eerste toetsreekse verlede jaar aangedui het het daar is probleme, het die universiteit met indringende ondersteuningsprogramme begin.
Dit was baie suksesvol en verlede jaar se die slaagsyfer het goed met vorige jare s’n vergelyk.
Die Universiteit van Stellenbosch (US) sê sy eerstejaarsakademie het spesifiek voorsiening gemaak vir die 2009-eerstejaarsgroep.
Hoewel die uitslae van hereksamens nog nie bekend is nie, het die akademie ervaar dat die groep in sy geheel nie sleg afsteek teen die 2008-groep nie, sê mnr. Mohamed Shaikh, senior direkteur van kommunikasie en skakeling.
Op sekere terreine blyk daar probleme te wees, maar op ander vaar studente nou weer beter.
Een US-fakulteit sê hy het ’n verbetering in uitslae gesien waar wiskunde nie ’n deurslaggewende rol speel nie, maar ’n afname waar wiskunde wel ter sprake was. Oor die algemeen lyk dit asof studente se wiskundevaardighede nie op dieselfde peil as vorige jare was nie.
Talle fakulteite het egter ingrypings soos tutoriale en ekstra klasse ingestel en dit was meestal suksesvol.
“Fakulteite in rigtings soos lettere, regsgeleerdheid en opvoedkunde meen steeds nuwelingstudente se lees- en skryfvaardighede kan beter wees.
Dis egter nie ’n nuwe uitdaging nie en dit kan nie sonder meer voor die deur van die nuwe kurrikulum gelê word nie,” sê Shaikh.
Volgens prof. Driekie Hay, viserektor van onderrig en leer aan die Universiteit van die Vrystaat, was daar ’n teenstrydigheid tussen die 2009-eerstejaarsgroep se matriekwiskundepunte en hul vaardigheidsvlakke.
Hierdie groep se wiskundepunte was ook baie hoër as die vorige matrieks s’n.
Sonder die ou hoër en standaardgraad was dit moeilik om die topwiskundepresteerders te identifiseer en studente in geskikte wiskundemodules te plaas.
By die Universiteit van Johannesburg (UJ) wys voorlopige uitslae dat verlede jaar se eerstejaars veral in wetenskapprogramme swakker gevaar het.
Hoewel eerstejaars al lank bykomende ontwikkeling nodig het om hulle op universiteit te help, lyk dit asof verlede jaar se groep meer uitdagings gehad het, sê die UJ.
Dit mag nodig wees om sekere kurrikulums en onderrigmetodes in die toekoms daarvolgens aan te pas.