US straf dalk uitpraters

Die Universiteit van Stellenbosch (US) word deur regstappe bedreig omdat hy dalk die sogenaamde “fluitjieblaserwet” oortree het.

Die universiteit het glo die Wet op Beskermde Openbaarmaking “geïgnoreer” weens sy “gebrekkige beskerming” van ’n werknemer wat die geldelike verknorsing van Suspi, sy sportprestasie-instituut, ondersoek het.

Die universiteit wou nie bevestig of ontken dat die universiteit Vrydag reeds deur regslui hieroor ingelig is nie, maar Rapport het op goeie gesag verneem dis wel die geval.

Suspi het dié werknemer vroeër aan ’n tugverhoor onderwerp, maar geen bevinding is nog gemaak nie.

Johann Mettler, voorsitter van die Suspi-direksie, het pas bedank ná berigte oor moontlike finansiële wanbestuur en die bestuurstyl van Gugu Ntuli (39), die uitvoerende hoof. Geen redes vir sy bedanking is gegee nie.

Die universiteit het deur sy tegnologie-oordrag-maatskappy InnovUS ook aangekondig Suspi-personeellede gaan dalk afgelê word en die instituut gaan dalk ontbind word.

Vroeër vanjaar het die bekende rolstoelatleet Ernst van Dyk, asook verskeie sportwetenskaplikes, uit Suspi se diens bedank.

Suspi is jare gelede gestig om ’n gespesialiseerde diens aan Maties se sportklubs te lewer.

Dit vorm ’n belangrike deel van sportwetenskaplike navorsing op die kampus.

Die instituut val onder ­InnovUS, wat die kommersialisering van die US se innovasies en intellektuele eiendom deur afwentelmaatskappye bestuur.

Nadat Rapport verlede week oor moontlike finansiële wanpraktyke by Suspi berig het, het ’n herrie hieroor op die kampus en in Stellenbosch losgebars.

Die universiteit het ingegryp en drastiese stappe rakende Suspi aangekondig.

Die US het vroeër aangekondig drie Suspi-werknemers is geskors of afgedank nadat ’n bedrogspul blootgelê is waarby sowat R1 miljoen betrokke is.

Etlike US-werknemers het egter laat blyk roekelose finansiële bestuur vorm deel van die “verdwene” miljoen en dat van die aangeklaagdes dalk die fluitjieblasers is.

Die afgelope week is spoedvergaderings op die kampus gehou en ’n aansoek van Suspi vir ’n oortrekkingsgerief van R6 miljoen by die universiteit is afgekeur.

’n Werknemer het ’n grieweprosedure teen Ntuli by prof. Julian Smith, die viserektor gemoeid met gemeenskapsinteraksie en personeel, begin.

Prof. Leopold van Huyssteen, Suspi-direksielid aangewys deur InnovUS, het gesê ’n herstrukturering van Suspi word nou gedoen met ’n “nuwe, maar kleiner direksie ter wille van vinniger besluitneming”.

“Die direksie sal nader aan die dag-tot-dag-funksionering van Suspi staan.”

Van Huyssteen sê Suspi is ’n “finansieel onderpresterende maatskappy”.

’n “Veranderingsbestuurder” word in die vooruitsig gestel en die kostestruktuur van Suspi sal “oordeelkundig afbestuur word”.

“Die personeellede is reeds ingelig dat die sakeplan hersien gaan word, dat herstrukturering kan volg en dat poste in die gedrang kan kom.”

Volgens hom “het Suspi goeie inisiatiewe, soos die Paralimpiese span wat in Londen uitmuntend gepresteer het”.

“Dis nie uitgesluit dat die herstrukturering ’n uitwerking op die voortbestaan van die maatskappy kan hê nie.”

Nadat berig is Ntuli is sonder ’n behoorlike dienskontrak teen byna R900 000 per jaar aangestel, hou Van Huyssteen vol “die personeel van Suspi is behoorlik aangestel”.

“Die verlies van R1 miljoen is gely deur diefstal, bedrog, nie-nakoming van beleid en nalatigheid.”