VF+ in twis oor geld

’n Twis woed in die VF+ oor die wyse waarop dié party se geldsake hanteer word.

Midde-in die drama is R150 000 wat die Naspers-voorsittersfonds verlede jaar op nasionale vlak aan dr. Pieter Mulder se VF+ gegee het. Dié skenking het egter in die Wes-Kaapse partykoffers beland waar Mulder se broer, dr. Corné Mulder, provinsiale leier is.

“Die Wes-Kaap het dié donasie gekaap en só ander provinsies benadeel,” het Hennie Taljaard, geskorste voorsitter van die VF+ se finansiële komitee, gister gesê.

Volgens hom het dr. Pieter Mulder versuim om sy broer daaroor vas te vat.

Taljaard voer ook aan hy is Donderdag uit die party geskors om te verhinder dat hy gisteroggend dié “ongerymdheid” en ’n verslag oor ander “ondeursigtige praktyke” op die party se federale raadsitting bekend maak.

Dr. Pieter Mulder het Taljaard se aantygings gister afgemaak en gesê die verslag is “deurspek met foute”.

“Daar was geen korrupsie nie, geen geld is weg nie. Wat ons betref, is die donasie reg aangewend en die federale raad het dit (die inbetaling daarvan in die Wes-Kaapse bankrekening) goed­-gekeur.”

Mulder sê Taljaard is gegrief omdat die party hom vasgevat het oor pligsversuim. “Sy hoofwerk was om geld in te samel, maar hy het in twee jaar geen moeite gedoen nie.”

Taljaard erken hy is “gegrief”, maar oor die ondeursigtigheid. “Van die provinsies trek swaar, sekere mense betaal telefoonrekeninge uit hul eie sakke en intussen trek Corné se provinsie voordeel uit ’n?nasionale donasie.”

Taljaard sê hy wil nie die VF+ benadeel nie.

“Maar ek is nie die eerste lid wat geskors word nie. Die oomblik as jy jou mond oopmaak en die leierskap aanvat, raak hulle ontslae van jou.”