VIDEO: Onrus op Ceres

Die onrus oor plaaswerkers se lone het na Ceres uitgebrei waar polisie sake met rubberkoeëls probeer beheer het.






Beeld berig vanoggend:

Die staking van plaaswerkers het gister na verskeie dorpe in die Boland en Swartland uitgebrei.

Stakers het op talle plekke opgeruk en pakskure, landerye en wingerde beskadig.

Plaaswerkers van 16 dorpe in die provinsie het gister aan die eerste dag van ’n nuutgevormde koalisie se sogenaamde massa-aksie deelgeneem. Dié aksie is vir beter lone en leef- en werkomstandighede.

Vakbonde, plaaswerkerkomitees en gemeenskapsorganisasies, waaronder Cosatu, het die koalisie gevorm.

Hulle het in ’n kennisgewing aan medewerkers gesê:
“Dis tyd dat ons saamstaan en boere wys hoeveel mag en krag ons het. Ons het die vermoë om die hele vrugte- en wynbedryf tot stilstand te bring as ons ons arbeidsmag weerhou.”

Tony Ehrenreich, Wes-Kaapse Cosatu-voorsitter, het gistermiddag sowat 2 000 stakende plaaswerkers in De Doorns toegespreek.

Tina Joemat-Pettersson, minister van landbou, bosbou en visserye, was ook daar.

Sy het die gemeenskap van De Doorns “gesalueer vir hul brawe oorwinning” en gesê landbou gaan ná hierdie staking nooit weer dieselfde wees nie. Volgens haar sal ’n R150-dagloon ’n groot oorwinning wees. Sy het werkers gemaan om nie plase en eiendomme aan die brand te steek of te beskadig nie.

In Prince Alfred Hamlet moes die eienaar van Ceres Valley Fruit, ’n vrugtelekker-vervaardiger, toekyk hoe haar pakhuis, kantoor, vragmotors en vurkhyser brand.

Stakende plaaswerkers het eers die kantoor se deur oop­gekap en die kluis uitgebreek en alles toe aan die brand gesteek.

“Dit is hartverskeurend,” het Logie Tanandroyen gesê.

In Ceres is ’n polisiebeampte in die hospitaal opgeneem nadat hy in die Nduli-plakkerskamp, waar onluste uitgebreek het, gewond is.

Koringlande net buite die dorp is ook aan die brand gesteek.

In Robertson is wingerde ook aan die brand gesteek.