Vas ná moord op boer

’n Tiener (15) en ’n man wat glo verlede maand op parool vrygelaat is, is gearresteer weens die moord op mnr. Boet Cilliers (77) die naweek buite Stella.

Hulle verskyn vandag in die landdroshof in Vryburg.

Cilliers, van die plaas Erfdeel, se lyk is Sondagaand gekry nadat mnr. Theo Scholtz, ’n buurman, sy verlate bakkie sowat 3 km van die plaas langs die pad gesien het.

Cilliers se halfnaakte lyk is naby die huis gekry. Hy het vermoedelik ’n draad by die kraal reggemaak toe hy oorval is.

Die seun en die man (28) is Woensdag in Ramabesa by Madibogo in hegtenis geneem. Madibogo is tussen Delareyville en Sethlagole. Dit is net ’n paar kilometer van Cilliers se plaas.

Die ouer man is glo verlede maand op parool vrygelaat nadat hy tronkstraf weens wapendiefstal uitgedien het.

Brig. Thulani Ngubane, provinsiale kommunikasiehoof van die polisie, is gevra om dit te bevestig. Hy het dit egter teen druktyd nog nie gedoen nie.

Volgens ’n verklaring wat Ngubani vroeër uitgereik het, het die verdagtes ’n .22-geweer en ’n 6.35-pistool by hulle gehad.

Hulle het glo na die plaas gegaan om Cilliers te beroof, maar ’n worsteling het ontstaan.

Cilliers se hande en voete is vasgebind en hy is vermoedelik met ’n stomp voorwerp doodgeslaan.

Beeld verneem hy is nie in die voorkop geskiet, soos aanvanklik vermoed is nie, maar is so hard geslaan dat ’n aar gebars het.

Die aanvallers het met Cilliers se Nissan 1400-bakkie gevlug, maar dit ’n ent verder gelos.

Lt.genl. Zonkiswa Mbombo, provinsiale polisiekommissaris, het sy waardering uitgespreek vir die samewerking tussen die gemeenskap en die polisie wat tot die arrestasie gelei het.