‘Verkragte’ rugbyseun praat
2012-07-21 23:52
Drie maande ná die skokvoorval waarin ’n Kaapstadse skoolseun na bewering tydens ’n rugbykamp aan die Weskus gesodomiseer is, het die seun vir die eerste keer daaroor gepraat.
Die seun (16) sê hy steun sy ouers om die beweerde oortreders tot verantwoording te roep.
“Want dit kan keer dat dieselfde met ander kinders gebeur.”
Hy is ’n voormalige leerling aan die Edgemead High School en het eksklusief met Rapport gepraat oor die vermeende molestering met ’n besemstok en piesang.
Sy voorkoms is ook ontsier tydens ’n skool-rugbykamp by Velddrif.
Hy probeer die voorval op sy eie manier verwerk, sê die seun.
“Ek probeer om nie daaraan te dink nie. En ek maak maar ’n grap daaroor as iemand oor daai dag praat. Of ek ontken dit. Dan hou mense op om daaroor te praat of my te spot.”
Sy ouers het namens hom ’n klag by die polisie ingedien.
Die nasionale vervolgingsgesag (NVG) het die gesin onlangs laat weet adv. Megan Blaauw is aangewys om die saak te hanteer.
Volgens Eric Ntabazalila, ’n NVG-woordvoerder, is die saak na die polisie terugverwys vir verdere ondersoek.
Die seun se pa het intussen sy eie regsverteenwoordigers aangestel.
Hulle wag op ’n bevinding van die NVG.
Die Wes-Kaapse onderwysdepartement (WKOD) het bevind Edgemead High School het die sewe oortreders op ’n gepaste wyse gestraf deur hulle voor die skool se tugkomitee te daag weens hul “gedrag wat met alkoholgebruik gepaardgegaan het”.
“Al sewe is toepaslik gestraf,” lui ’n verklaring deur Redford Lawrence, die skoolhoof.
Die ouerpaar het toe hul seun na ’n plattelandse skool verskuif.
“Ek gaan nie toelaat dat die saak so maklik onder die mat ingevee word nie,” sê die pa.
“Dis waarom ek aan die deur van die NVG bly klop. My kind is verneder, of aangerand. Tot vandag toe het hy nie soveel as ’n verskoning van die skool gekry nie.”
Die jong uitblinker-sportman sê hy sien nou vir die eerste keer kans om te praat oor wat in April “aan my gedoen is”.
Hy was die jongste van die groep wat die Saterdag teen die plaaslike skool se eerste span gespeel het.
Die aand ná die wedstryd is hy na bewering met ’n besemstok en piesang gemolesteer terwyl hy geslaap het. Hy erken dat hy en van die seuns alkohol in die hande gekry het.
“Maar dit gee niemand die reg om sulke dinge aan my te doen nie.
“Toe ek Sondagoggend wakker word en die foto op my BlackBerry sien, het ek uitgefreak. Wat gaan hier aan? het ek gedink.
“Toe kyk ek in die spieël. My linkerwenkbrou was weg, afgeskeer. My hele neus vol tandepasta. Op my kaalgeskeerde kop was ’n penis geteken. Iemand wou glo op my kop ontlas, maar een spanlid het gekeer.
“Ek was woedend. Ek het tekere gegaan. Die ouens het net daar gestaan. Ek het ons afrigter gaan vra wat aangaan. Hy’t gesê hy weet nie. Ek kon nie verstaan dat my spanmaats dit kon doen nie. Ek het selftrots. Ek is verneder. Dis ’n verleentheid.
“Ek is bly ek is uit daardie skool. Ek is gelukkig waar ek nou is. Ek het great nuwe vriende. My koshuisvader en skoolhoof sê ek moet enige tyd met hulle praat as ek so voel.”
Eers was hy kwaad vir sy ouers oor die openbaarmaking van die voorval.
“Nie meer nie. Ek verstaan dit gaan nie net oor my nie. As ons kan keer dat dit met ander kinders gebeur, is dit goed.”