Waar kan jy jou dampie in vrede slaan?

Onduidelikheid heers onder rokers oor die bepalings van die jongste veranderinge aan die rookwet.

Sedert die nuwe wetgewing op 21 Augustus in die Staatskoerant gepubliseer is, is die bestuurders van werkplekke en openbare areas soos restaurante, kroeë en kuierplekke ook onseker oor hoe ver ’n roker van ’n ingang na ’n openbare plek moet wees.

“Daar is elemente van die nuwe wetgewing waarna nog gekyk moet word,” sê me. Christa Hugo, omgewingsgesondheidspraktisyn van die Stad Kaapstad.

Die nuwe wetgewing bepaal dat die minister van gesondheid, dr. Aaron Motsoaledi, self moet besluit hoe ver rokers in openbare plekke van deure, ingange en vensters af moet wees.

Motsoaledi het nog nie ’n aankondiging hieroor gedoen nie. Ook nie oor wat die rookbeperkings is in ander openbare plekke soos sportstadions, bushaltes, spoorwegstasies en plekke waar openbare optredes gehou word nie.

Hugo sê die wet is wel duidelik dat daar nie in openbare plekke onder enige dak of ’n gedeeltelike dak gerook mag word nie, behalwe in rookkamers wat aan die wetgewing voldoen.

Alle openbare plekke wat verbind word met volgende jaar se Wêreldbeker-sokkertoernooi sal ook rookvry wees.

Die minister moet ook nog aandui wanneer die verbod in werking sal tree wat sigaretvervaardigers verbied om na sigarette te verwys as “lig”, “matig” of “lae teerinhoud”.

Die wet verbied ook die gebruik van chemiese stowwe in sigarette, soos mentol of ander geurmiddels. Die datum waarop dit in werking tree, is nog onseker.

- Rapport