Wors se gemors
2013-02-02 23:26
Molly & Wors, die gewildste reeks op kykNET, is nie meer op die kassie nie, maar in Junie is die vetties terug – op die silwerdoek. Dié keer vat hulle hul kaskenades na die strate van Hollywood en Amsterdam.
Die storie loop so: Wors se werk besluit om hom Nederland toe te stuur. Molly gaan saam.
In Amsterdam is “die rook van boom en die besoek aan die dames van die nag mos so te sê verpligtend, of hoe?”
Dan besluit hulle om sommer in die glansryke Hollywood te gaan vakansie hou.
En hier, vertel vervaardiger en akteur Willie Esterhuizen, jaag Wors soveel bollie aan dat Molly hom net daar wil los.
“Julle gaan Molly en Wors sien soos nog nooit tevore nie.
“Die twee karakters gaan deur elke moontlike emosie in hierdie fliek. Veral Molly. Sy gaan deur hel,” sê Willie.
Die fliek is ’n bietjie anders as die reeks, sê hy.
“Ons sit nie soos vier vetties om ’n tafel nie. Hier is ons oral in die buiteland en jaag lekker aan.”
Willie sê ná vyf suksesvolle reekse op kykNET sluit hy nou die hoofstuk af met ’n vollengte- fliek wat die lagspiere behoorlik sal kielie.
“Kyk, almal gaan hou altyd vakansie in Margate, maar wanneer jy vir Wors met sy Margate-mentaliteit Amerika en Amsterdam toe stuur, kan jy net indink watse bollie hy gaan aanjaag.”
Die fliek is in September verlede jaar in Long Beach, Kalifornië, en in Amsterdam, Nederland, geskiet. Dis baie ongewoon vir ’n Afrikaanse fliek om oorsee geskiet te word, maar Willie sê hulle het dit gedoen om vir die kyker vars inhoud te gee.
Die enigste uitdaging waarmee hy oorsee geworstel het, was om 74 uur op vliegtuie tussen die stede met die aktrise Lizz Meiring (Molly) deur te bring...
Hy sê ook ouers hoef nie bekommerd te wees om hul kinders se oë en ore toe te hou vir vloekwoorde en stoute storielyne nie.
“Die fliek is bedoel vir alle ouderdomme en is niks rowwer as die reeks nie. Ons wil nie die getroue Molly & Wors-kykers die hel in maak nie.”
Ander akteurs wat in die rolprent te sien is, is Ben Kruger, Marcel van Heerden, Hanli Rolfes, Karen Wessels, Alvin Bruinders, Liane Heyl en die grapjas Joey Rasdien.
Die fliek is deur kykNET geborg en is van 7 Junie in NuMetro-teaters te sien.