Yo-Landi bring nuwe soort sexy na tydskrif
2012-07-28 23:57
- Artikelopsies
- Deel
- Kry Rapport op
Die gewilde manstydskrif FHM was nog altyd bekend om die sexy, langbeen-meisies op die voorblad.
In die Augustus-uitgawe raak hulle egter zef met Yo-Landi Vi$$er van die omstrede groep Die Antwoord op die voorblad.
Vi$$er pryk bostukloos. Bokshandskoene bedek die nodige.
Verder het sy net ’n eina-klein broekie aan en gee die kamera ’n uitdagende kyk.
Van sy konserwatiewe kollegas het hom afgeraai om Vi$$er op die voorblad te gebruik, sê die redakteur, Brendan Cooper.
“Ons wil wys FHM bly in voeling met sy lesers. Ons dink Yo-Landi is sexy, cool, talentvol, intelligent, suksesvol?.?.?. en ons weet ook party mense is maar skrikkerig vir haar.
“Ons is trots om te sien hoe sy en Ninja (haar sangmaat) die wêreld stormloop, daarom voel ons bevoorreg om haar op ons voorblad te hê.”
Cooper sê alles het begin met Die Antwoord se musiekvideo Baby’s on Fire, waarin Vi$$er in ’n tafelgebed dankie sê vir haar komende FHM-voorblad.
“Ons fone het nie ophou lui nie soos lesers wou weet of dit waar is. Ons is net so bly alles het uitgewerk en dat ons haar inderdaad kon gebruik.”
Die Antwoord se musiekvideo’s is al meer as 32 miljoen keer op YouTube gekyk.
Dis nie net gewone mense wat na hul musiek luister nie. Die Amerikaanse sangeres Katy Perry, bekend om treffers soos I Kissed a Girl en The One That Got Away, het al getwiet sy luister na die musiek van dié Suid-Afrikaanse groep.
Sy het Die Antwoord se naam in dieselfde asem, of dan twiet, as Leonard Cohen, Lana Del Rey, M.I.A. en Jessie James genoem.