Tina Joemat-Pettersson, minister van landbou, het inderhaas teen ’n koste van R400 000 teruggevlieg na Suid-Afrika – om te help met pres. Jacob Zuma se troue.
Dit blyk uit die finale verslag van adv. Thuli Madonsela, die openbare beskermer, oor Joemat-Pettersson se omstrede sakevlug uit Swede met haar twee kinders en hul oppasser op Nuwejaarsdag 2010.
Luidens die verslag wou Joemat-Pettersson en haar voormalige stafhoof, Bafedile Bopape, aanvanklik nie aan die ondersoekers sê hoekom sy aan die einde van 2009 so haastig uit Swede teruggekeer het nie.
Sy was op ’n sakebesoek en sou daarna saam met haar kinders vakansie hou toe sy dringend teruggeroep is deur ’n “gemagtigde amptenaar in die presidentskantoor”.
Die vlugte vir haar en twee amptenare het R250 000 gekos en dié van haar kinders en oppasser ’n bykomende R151 000.
Joemat-Pettersson en Zuma het op 2 Januarie, die dag ná haar aankoms, by die Hotel Melrose Arch in Johannesburg ontmoet.
Dit was ’n Saterdag, twee dae voor Zuma se troue met Thobeka Madiba by Nkandla.
Omdat hulle geen spoor kon vind van ’n noodgeval of krisis wat die minister se vroeë terugkeer genoodsaak het nie, het Madonsela se ondersoekers Joemat-Pettersson vir ’n tweede keer ondervra.
Sy het met die sak patats vorendag gekom.
Sy het aan die ondersoekers gesê sy het vroeër teruggekom om hooggeplaastes en vername gaste te help met “die invoer van voorgeskrewe goedere wat hulle benodig het gedurende hul verblyf in Suid-Afrika”.
Sy het Bopape die afgelope week daarvoor verantwoordelik gehou dat die R151 878 vir haar kinders en hul oppasser deur die staat betaal is.
As Bopape haar ingelig het dat die staat nie veronderstel was om daarvoor te betaal nie, sou sy self die kaartjies betaal het, het sy gesê.
My kinders, hul oppasser en ek het onbeperkte reisvoordele enige tyd en plek na enige plek in die wêreld wat betaal word uit die erflating van my oorlede man.”
In die oorspronklike verslag wat aan die media gelek is, is Bopape, wat deesdae in die kantoor van die direkteur-generaal van landbou werk, beveel om die R151 000 te betaal, maar in die uiteindelike weergawe van die verslag moet die minister opdok.