Zwelakhe Sisulu sterf op 61

Zwelakhe Sisulu (61), seun van Walter en Albertina Sisulu, is gister oorlede.

Volgens Mathata Tsedu, sy vriend en eertydse kollega, was hy sieklik en het hy diabetes gehad.

“Ek was geskok toe ek van sy dood gehoor het. Ek het geweet hy was sieklik, maar nie dat hy só sieklik was nie,” het Tsedu, projekbestuurder van die persvryheidskommissie en oudredakteur van City Press, gister gesê.

Pres. Jacob Zuma het gistermiddag sy skok en hartseer oor Sisulu se dood uitgespreek.

Hy het sy meegevoel met die gesin oor die afsterwe van dié vryheidsvegter, joernalis en sakeman in ’n verklaring uitgespreek.

As redakteur van die New Nation is Sisulu verskeie kere in die 1970’s en 1980’s aangehou toe hy teen apartheid uitgevaar het.

Hy en sy ma is by tye in dieselfde huis in huisarres gehou en kon nie met mekaar praat sonder om die wet te oortree nie, het Tsedu vertel.

Sisulu was ook redakteur van die Sunday Post, wat ’n “Laat Mandela vry”-veldtog begin. Hy en die koerant is verskeie kere onderskeidelik ingeperk en verbied.

Luidens ’n verklaring deur die vakverbond Cosatu het Sisulu in 1980 ’n vonnis van nege maande tronkstraf uitgedien omdat hy geweier het om teen ’n verslaggewer van die Sunday Post te getuig.

Sisulu was die president van die Mediawerkersvereniging van Suid-Afrika en het gedien as groephoof van die SAUK met die omskakeling van die organisasie as spreekbuis van die vorige regering na openbare uitsaaier.

Nadat hy die joernalistiek verlaat het, het Sisulu as bedrewe sakeman naam gemaak.