kykNET maak stilletjies planne vir nóg kanale
2012-08-18 23:49
- Artikelopsies
- Deel
- Kry Rapport op
As jy Afrikaans is, hoef jy nou nie net kykNET te kyk nie.
MultiChoice se enigste Afrikaanse kanaal maak stilletjies planne vir nóg kanale in die taal. Die inhoud, getal kanale en begindatum is egter nog ’n groot geheim.
Nico Nel, kykNET-woordvoerder, het bevestig hulle het planne om nuwe Afrikaanse kanale by te kry. “Maar in hierdie stadium is dit nog net dít: planne.”
Dinge moet nog gefinaliseer word, het hy by navraag gesê.
Rapport verneem daar word al met vervaardigers gepraat oor inhoud. Daar is sprake in kykNET se gange dat een van die kanale dalk ’n 24-uur-musiekkanaal is en ook dat daar planne is om die beoogde Afrikaanse kykstof aan te bied op goedkoper DStv-pakkette.
Die koms van nog Afrikaans sal na verwagting die satellietdiens DStv sterk in sy mededinging met SABC2, wat steeds die tuiste is van gewilde Afrikaanse programme soos Noot vir noot, 7de Laan, Fokus en die Afrikaanse nuus. ’n Geraamde 2,3 miljoen mense kyk 7de Laan.
Johan Stemmet se Noot vir noot word volgens die maatskappy TVSA deur 2,1 miljoen mense gekyk en sowat 1,8 miljoen mense kyk graag na Riaan Cruywagen se nuus.
Die enigste ander rolspeler in die Afrikaanse mark is TopTV, wat in Mei 2010 die Afrikaanse kanaal ASTV bekendgestel het.
Rapport verneem egter ASTV sukkel met kykertalle.
Nel wou nie kykNET se kykertalle bekend maak nie, maar het gesê die sepies Villa Rosa en Binneland is die kanaal se gewildste programme. “eNuus en Getroud met rugby neem so nou en dan die voortou.”