Galery vier die Franse en meer
2012-10-13 23:17
- Artikelopsies
- Deel
- Kry Rapport op
Die laaste tyd het die Johannesburgse Kunsgalery gereeld die nuus gehaal om die verkeerde redes – soos in Januarie, toe dit aan die lig gekom het dat meer as ’n halfmiljoen se beeldhouwerk uit die museum gesteel en moontlik as skroot verkoop is.
Dit is dus heerlik om die draer van goeie nuus te wees: Aan die einde van die maand open ’n uitstalling waarin baie van die belangrike historiese werke in die museum se versameling weer ’n slag te sien sal wees.
Die uitstalling, French Connections, wat in samewerking met l’Institut Français d’Afrique du Sud (IFAS) gehou word, sal fokus op Franse kunstenaars of dié met Franse konneksies.
Werke van wêreldbekende name soos Eugene Delacroix, Claude Monet, die beeldhouer Auguste Rodin en Edouard Manet sal te sien wees.
Die impressioniste is besonder goed verteenwoordig met name soos Paul Cézanne, Edgar Hilaire Degas, Jean-Baptiste Armand Guillaumin, Berthe Morisot, Camille Pissaro, Pierre-Auguste Renoir terwyl post-impressioniste soos Paul Gauguin, Paul Cézanne, Vincent Van Gogh, Henri Matisse and Andre Derain ook te sien sal wees.
Die galery besit ook ’n lieflike versameling van die post-impressionis Henri de Toulouse-Lautrec en hierdie versameling sal almal sáám in ’n aparte galery te sien wees.
Die Spaanse kunstenaar Picasso het natuurlik ook ’n paar jaar in Parys deurgebring – ’n goeie verskoning om 13 van sy werke in die museum se versameling uit te stal.
Gerard Sekoto, wat in 1947 Parys toe is, sal ook goed verteenwoordig wees.
Die uitstalling open op 28 Oktober en sal tot Maart volgende jaar te sien wees. Toegang is gratis.
So is dit nie tyd dat jy weer ’n draai in Joubertpark gaan maak nie?