Hou jou lyf argeologiese speurder
2012-11-17 23:51
AJ Opperman in Johannesburg
Jy staan voor ’n outopsie-tafel en voor jou lê die beendere van twee vroue.
Wat ook al met hulle gebeur het, dit moes erg gewees het.
’n Groot kraak loop oor die een vrou se skedel, ’n aanduiding dat sy dalk met ’n harde hou om die lewe gebring is. Maar as jy verder kyk, sien jy ’n gat bokant haar oogbank, die soort wat veroorsaak word wanneer iemand met ’n pyl geskiet is.
Wat het met haar gebeur?
Mens sou dink die vroue is iewers oorval en wreed vermoor, maar dan sien jy die skulpkrale om hul nekke en besef dat hulle met ’n uitgebreide ritueel begrawe is.
’n Moord? ’n Rituele teregstelling?
Nee, dis nie ’n toneel uit Quincy of CSI nie.
As jy die bostaande sien, is jy een van duisende Suid-Afrikaners wat binnekort deel gaan hê aan die oplossing van een van die wêreld se oudste misdaadraaisels.
Die Universiteit van die Witwatersrand (Wits) het replikas bekom van die beendere van twee vroue wat duisende jare gelede in misterieuse omstandighede gesterf het en nooi nou Suid-Afrikaners om hul lyf speurder te kom hou en dié raaisel te probeer oplos.
Volgens prof. Francis Thackeray, hoof van Wits se instituut vir menslike evolusie, is die doel om besoekers met die uitstalling te “stimuleer”.
“Die agtergrond wat die uitstalling skets, is twee vroue wat sowat 7?400 jaar gelede vermoor is. Hul geraamtes is tussen 1928 en 1934 in Teviec, Frankryk, ontdek. Maar die aard van hul geraamtes bring mee dat die rede vir hul dood nie heeltemal so duidelik is nie.”
Prehistory: The Investigation is ’n uitstalling wat die afgelope week in die Origin-sentrum op die Wits-kampus begin het. In Parys het dieselfde uitstalling 300 000 voornemende speurder-argeoloë gelok.
Dit word deur Wits in samewerking met die departemente van wetenskap en tegnologie en kuns en kultuur aangebied, asook met die medewerking van die Toulouse-museum in Frankryk.
Die uitstalling is baie interaktief met skerms waar jy vrae kan intik, wat jou dan op ’n spoor bring. Besoekers word toegerus met argeologiese gereedskap in die vorm van inligting oor antropologie, anatomie, chronologie, die omgewing, tegnologie en sosiale lewe.