Krenterige Afrikaners wys hoofstroom se liefdeloosheid

krenterig b.nw. Oormatig kleinlik, bekrompe, kleingeestig; wat buitensporige waarde heg aan kleinlike besonderhede, dikw. gepaardgaande met vitterigheid en soms ook prikkelbaarheid: Krenterige argumente, kritiek. ’n Krenterige besluit, politieke houding, gees by onderhandelinge. [Fr. raisin de Corinthe skaars (soos korinte)]. – Elektroniese WAT: Woordeboek van die Afrikaanse Taal (A tot R). Hoofredakteur W.F. Botha.

Mens wil wrintiewaar nie op Sondag pruttelrig wees nie, maar die vet weet, só kan dit ook nie aangaan nie.

Wat is dit met Afrikaners dat so ongoddelik baie van ons so verstikkend parogiaal kan wees?

Pharos se Tesourus van Afrikaans praat van, onder meer: afgeslote, kleinburgerlik, kleinmenslik, kinderagtig, kleinmoedig, verstok, verstar, kleinhartig, enghartig.

Sê maar daai woorde hardop en proe hoe bitter dit op die tong lê, want dit beskryf ’n walglike soort mens.

Wie het onlangs gekyk na van die skrikwekkende threads, of kommentaarkettings (die slim woordeboekman Fred Pheiffer se woord) wat mense op Afrikaanse koerante se webblaaie los?

(Ja, op Engelse webtuistes ook, maar dis meestal baie gedemp vergeleke met van óns unieke bitterbekkigheid.)

Kom, gaan koekeloer gerus, net om jouself te herinner aan hoe minagtend en gruwelik mense kan raak, veral as dit kom by wit mense wat oor swart mense of heteroseksuele mense wat oor gay mense kommentaar lewer.

Van die oordele wat genadeloos gevel word, is so erg dat hulle verwyder moet word. Gereeld is die meeste van die liefdelose kommentators anoniem en oor die algemeen met ’n Bybel onder die arm.

Moenie eens praat van enigiets wat buite hul verwysingsraamwerk is nie (haal Die Antwoord op, dan is die gort gaar).

’n Paar voorbeelde: Oor die doepa wat hy vir die vele skete van die Nuwe SA aanbeveel, skryf Ernst Marais: “Stewige dosis Afsonderlike Ontwikkeling. Toe het Suid-Afrika gewerk.” Nevermind die feit dat apartheid swart mense van alle menswaardigheid beroof het. Nee, bring dit terug, basuin hy.

Oor gay mense laat weet ene Adre Claassens: “Dit bly ’n siek leefstyl met dubbele standaarde wat op mense afgedwing word wat bitter graag normaal wil bly en hul Here so wil eer!”

Oor Die Antwoord is die webtuiste www.glodiebybel.co.za vol pittighede. Hulle kla oor: “Ninja se motor se nommerplate is ‘ZEF 666 GP’. Daar is nie twyfel wat ‘666’ uitbeeld nie. Dit het niks met zef te doen nie.”

Die feit dat so ’n nommerplaat heeltemal met ironie en spottend uitgebeeld word, is verlore op dié mense.

Maar, skryf hulle heeltemal uitasem, daar is nog: “Die Antwoord se konneksie met die NG Kerk is dat Yo-Landi Vi$$er se pads. Ben du Toit is (volgens ’n artikel... in die vrouetydskrif Sarie lyk dit egter of dit Ben du Toit se aangenome kind is).” Huh?

“Hy is die NG Kerk se hoof van kommunikasie wat in 2006 as parlementêre verteenwoordiger van die NG Kerk, die parlement aangemoedig het om homoseksuele huwelike in Suid-Afrika te wettig.” So what?

Nou ja, moenie dink hierdie kommentators is randeiers nie.

Nee, hulle verteenwoordig die hoofstroom. En dit, liewe leser, is vandag die krenterige, klipharde, liefdelose hart van baie Afrikaners.

Wat ’n jammerte.