Muhammad se Angelo gooi handdoek in
2012-02-04 14:44
My man. Of in Engels: My man. My guy. My fighter.
Dís hoe Angelo Mirena deurentyd na sy boksers verwys het. Daar was ’n bulband tussen hom en hulle – onder wie Muhammad Ali, asook Carmen Basilio, Willie Pastrano, José Nápoles, Sugar Ray Leonard en later selfs ’n 45-jarige George Foreman: almal groot name, almal wêreldkampioene.
Maar ook ysters omdat Angelo Mirena inderwaarheid Angelo Dundee was, die legendariese boksafrigter wat amper ’n eeu gelede in Philadelphia gebore is en sy familienaam verander het om sy boksbetrokkenheid vir sy ma en pa weg te steek.
Nou, kort op die hakke van Smokin’ Joe Frazier se heengaan, is Angie ook vort. Die helde val. Boks se goue era word stuk vir stuk deur die dood verteer. Ali is volgende op die lys. Net nou die dag nog het die selfverklaarde “Greatest” ’n wankelrige 70 jaar oud geword: Muhammad beweeg soos ’n trapsuutjies en praat soos ’n fluisteraar.
Dundee – korter en dikker teen die einde, met langer ore en ’n poedinggesig – het spesiaal uit Miami Louisville toe gevlieg om te gaan vier waar die twee, Ali en Angie, reeds in 1959 ontmoet het. En in 21 jaar as Ali se afrigter was Dundee net een keer as hoekman afwesig: tydens “Die Beste” se 1971-geveg teen Jimmy Ellis. Angelo, sien, het albei manne afgerig – maar as Ellis se bestuurder het hy Jimmy se hoek vir die ontmoeting gekies.
Nie dat dit gehelp het nie, hoewel Dundee daarvoor bekend was dat hy mirakels as hoekhulp kon optower. In Ali (toe nog Cassius Clay) se allereerste titelgeveg, in 1964, het Sonny Liston se snymedisyne in Muhammad se oë beland en hom tydelik verblind. Dundee het oë gewas dat dit bars en “sy man” eenvoudig in die kryt teruggestoot met die woorde: “Hardloop vir jou lewe.”
Wat Ali gedoen het totdat hy weer kon sien. En toe was dit nag vir Sonny.
Einste Dundee het ’n klein skeurtjie in Ali se linkerbokshandskoen opsetlik vergroot nadat “sy man” in 1963 deur Henry Cooper planke toe gestuur is. Nuwe handskoene was nêrens te vinde nie, maar die soektog het hersteltyd geskep, waarna Cooper gestraf is.
Dundee het ook aan die einde van die 12de ronde in Sugar Ray se 1981-geveg teen Tommy Hearns gegil: “You’re blowing it, son!”
Leonard het hernieude krag gevind en Hearns in die 14de ronde gestuit. “Dis nie wát Angie gesê het nie,” het Sugar gesê. “Dis hóé hy dit gesê het.”
Uiteindelik het Dundee sy grootste roem as bobaas-hoekman en -motiveerder verwerf. Sy lojaliteit as wit gesig in ’n kamp vol swart radikale in ’n era toe Ali ’n swart Moslem geword het, was ook aangrypend. Angie was ’n mens-mens. “Dit kos niks om vriendelik te wees nie,” het hy 90 jaar lank gesê. En toe gryp ’n bloedklont hom op die terugvlug uit Louisville, waar hy sy boesemmaat finaal gaan groet het.
Angelo Dundee sal rustig slaap. In ’n milieu vol geweld had hy geen vyande nie, net vriende – plus oordonderende respek, ook uit hierdie oord. Angie was my man. En Ali s’n ook.
Egmont Sippel is ’n motorskrywer en boksliefhebber.