Patrick Moore oorlede

Patrick Moore (89), die sterrekundige wat die maan se oppervlak gekarteer het, is oorlede.

Moore was langer as 50 jaar die aanbieder van die BBC se TV-program The Sky at Night. In dié tyd het hy net een episode weens siekte gemis.

Weens ’n hartkwaal is Moore as kind tuis onderrig. Hy het van sesjarige ouderdom in die astronomie belanggestel en was op 11 reeds lid van die British Astronomical Association. Hy het op 13 sy eerste wetenskap­like studie oor die maan gepubliseer.

Moore is deur sowel amateurs as kenners in die sterrekunde bewonder. Hy het die vermoë gehad om inspirerende verbande te trek tussen die hemelruim en aardse goed, soos om die melkweg met ’n gebakte eier te vergelyk.

Hoewel hy geen graad in die wetenskappe gehad het nie – wel eredoktorsgrade – was daar min mense wat ’n gehoor met so min selfbelangrikheid so vasgevang kon hou.

Dié skrywer, musikant, krieketspeler, politikus en TV-persoonlikheid se navorsing oor die hemelruim is deur Amerika en Rusland in hul ruimteprogramme ingespan.

Om later in die koninklike lugmag opgeneem te word, moes hy oor sy ouderdom lieg. En om sy siekte te verberg, het hy iemand oorreed om namens hom die mediese ondersoeke te ondergaan. Sy toestand is wel later tydens hospitalisasie ontdek.

Koningin Elizabeth II het dié alleenloper in 2001 tot ridder geslaan vir sy diens om die wetenskap na die publiek en die uitsaaiwese te neem.

Patrick Moore: 4 Maart 1923 – 9 Desember 2012