Wolwedans net begin vir Jozua
2012-10-07 00:24
- Artikelopsies
- Deel
- Kry Rapport op
Jozua Malherbe is eers drie jaar nadat Wolwedans in die skemer oor die radio begin het, gebore.
“Toe die reeks klaargemaak het, het ek skaars begin praat.”
Nou is hy die regisseur wat die gewilde 1979-radiodrama, wat destyds ’n miljoen luisteraars gehad het, op die silwerdoek moes vaspen.
Wolwedans in die skemer is Vrydag landwyd bekend gestel.
“Terwyl ons aan die fliek gewerk het, het ek die hele tyd aan my ouma Mona (82) gedink,” sê hy.
“Sy hou van stories en ek het die fliek geskiet asof ek die storie vir haar vertel.
“Ek het geweet as Ouma dit like, dan is dit reg. Die res het net reg ingepas.”
Dié radiodrama was nog altyd volksbesit.
“Mense loop al 20 of 30 jaar lank met die idee in hul kop. Hulle het die radiokarakters gesigte gegee – vir hulle was die storie en die karakters lewend.
“Ek wou mense se verbeelding verbysteek. Dís wat die fliek so vol en ryk maak.”
Volgens Malherbe het hy nooit enige druk ervaar tydens die verfilming nie.
“Ek en ’n amazing span is vir vyf weke Hazyview toe gestuur waar ons heeltyd in hierdie kreatiewe atmosfeer gewerk het.
“Alles was net soveel pret, en dis waarop ons gefokus het.”
Leon van Nierop (skrywer van die boek waarop die radiodrama gegrond was) het ook gereeld op die stel ingeloer.
“Daar was ’n beautiful sinergie tussen my en Leon. Ek dink hy sou my beslis gekeer het as ek nie reg gemaak het nie.
“Ek het ook aan die einde van elke dag my skote vir Leon gewys. Ek het net geweet ons is op dieselfde bladsy.”
Malherbe sê hy wil hê ou ooms en tannies moet die fliek net soveel soos die jonger gehore geniet.
“Dis my eerste fliek as regisseur en ek is baie trots op my werk.”
En wat maak volgens hom ’n goeie regisseur?
“Een wat jou storie vertel...”
Malherbe het egter meer as net ’n fliek gaan maak; hy het ook met ’n meisie teruggekom.
“What happens in Hazyview, tends to come home...” spot hy.
Hy en die aktrise Rolanda Marais, wat die hoofrol in Wolwedans in die skemer vertolk, het mekaar ná die verfilming op ’n ander vlak leer ken.
“Ek en ’n paar mense van die cast het op ’n road trip gegaan... Rolanda was een van hulle.” En sedertdien het die twee meer as net ’n werkverhouding.
Die paartjie bring graag hul vrye tyd saam deur deur te kook, flieks te kyk of te gaan stap.
Televisiekykers sal ook Malherbe se naam herken as die regisseur van die kykNET-drama Getroud met rugby.
“Dis ’n heeltemal ander styl as Wolwedans. As regisseur moet ’n mens soveel moontlik verskillende style kan doen, maar jy moet steeds jou vingerafdruk kan nalaat.”
Hy is vir die volgende vier maande in Stellenbosch, waar hy aan ’n nuwe reeks vir kykNET werk.
Thomas @ is gegrond op ’n kinderboekreeks deur Carina Diedericks-Hugo wat nou in 26 episodes omskep is.
Daarna begin hy werk aan Donkerland uit die pen van Deon Opperman.
“Dit strek oor 140 jaar van ons land se geskiedenis en ek gaan 13 episodes verfilm – dis gelyk aan ses flieks!”
Malherbe sê ook as daar nou een boek is waarvan iemand nog eendag ’n fliek moet maak, dan is dit André P. Brink se Duiwelskloof.
“Ek glo daar gaan net meer en meer movies kom. Daar is tans ’n baie sterk kreatiewe saamtrek van regisseurs.”