9/11-werkers kan skik oor siektes

Ná ’n jare lange stryd het reddingswerkers wat ná die 9/11-terreuraanvalle op die Ground Zero-terrein gewerk het Vrydag verneem hulle kan tot $657,5 miljoen (byna R9 miljard) van die stad New York en konstruksiemaatskappye kry.

Talle werkers wat meen hulle is nou nog siek weens die stof wat hulle op Ground Zero ingeasem het, moes lank baklei voordat die New Yorkse munisipaliteit en maatskappye dié aanbod gemaak het.

Die meeste van die geld sal deur die Amerikaanse federale noodbestuuragentskap opgedok word.

Volgens mnr. Michael Bloomberg, burgemeester van New York, is die ooreenkoms ’n “regverdige en redelike oplossing vir ’n komplekse stel omstandighede”.

Diegene wat meen hulle is op vergoeding geregtig, moet bewys hulle was op die toneel van die World Trade Center kort nadat dit in duie gestort het. Hulle moet ook mediese verslae verskaf om te bewys dié werk is die oorsaak van hul huidige probleme.

Indien dié ooreenkoms nou deur die mat sou val, sal die hofsake oor twee maande in alle erns begin.

Van die werkers sluit in brandweerbeamptes, polisielede en konstruksiewerkers. Talle beweer hulle is nooit van die nodige beskerming voorsien voordat hulle op die toneel gaan werk het nie. Die probleme waarmee hulle nou sit, sluit in asemhalingsprobleme soos asma en kanker.

Tipies van die werkers se stories is dié van mnr. James Nolan, ’n 45-jarige skrynwerker van die buurt Yonkers wat gehelp het om lyke uit die bourommel te verwyder en stellasies te bou waarvan brandslange gespuit kon word.

Deesdae het hy long- en beenprobleme waarvoor hy ses soorte medikasie gebruik. Hy het die stad ses jaar gelede gedagvaar en hou vol die owerhede het geweet die lug is erg besoedel.

Nou is hy bly die geveg staan einde se kant toe.

“Ons moes jare lank vir ons verdienste veg. Nou kan ek effens gerus voel en sal my vrou en kinders iets kry indien ek sterf.”

Sommige werkers gaan net ’n paar duisend dollar uit die skikking kry, maar ander kan meer as $1 miljoen (sowat R7,4 miljoen) verwag.

Die regsfirma Worby, Groner, Edelman & Napoli, Bern wat 9?000 van die klaers verteenwoordig, kan tot ’n derde van die uitbetaling as fooi kry.

- Rapport